Илгарилари саноат ва қурилиш материаллари марказларда ишлаб чиқарилар эди. Юртимиздаги тадбиркорликка яратилган шароит туфайли энди ҳатто чет туманларда ҳам шундай ишлаб чиқариш корхоналари муваффақиятли фаолият юритмоқда. Данғарадаги “Ёғду” карбит заводи уларнинг бири. У мамлакатнинг карбитга бўлган эҳтиёжини 80 фоизгача қондириши мумкин. аммо ишлаб чиқариш жуда катта миқдорда электр энергияси истеъмол қилади.

– Бир ойда 400-450 минг киловатт соат электр энергияси ишлатамиз. Ойма- ой ўртача  400 миллион сўм атрофида тўлов қиламиз, – дейди “Ёғду” МЧЖ таъсисчиси Равшанбек Асқаров.– Электр энергия сарфини камайтириш учун 660 киловаттли қуёш панелларини ўрнатдик. Шунинг ҳисобига истеъмол қилинаётган 30 фоиз энергияни қуёш панеллари қоплаяпти.  

Ҳа, “Ёғду” корхонаси ҳовлида бир парча бўш жой бўлса ҳам қуёш панелларини ўрнатди ва дарҳол унинг молиявий даромадини ҳис қилди. Шунинг учун ишлаб чиқаришни кенгайтирмоқчи.

– Фақат Ўзбекистон хомашёсини ишлатамиз. Коксни Фарғона нефтни қайта ишлаш заводидан оламиз. Оҳак водийда ишлаб чиқариляпти. Хомашё 100 фоиз маҳаллий, – дейди Равшанбек Асқаров.–Асосий истеъмолчимиз Навоий кон- металлургия комбинати.

Энди бино-иншоотларнинг томларига яна 350-400 киловатт соат электр энергияси ишлаб чиқариш қувватига эга қуёш панеллари ўрнатиш мумкин экан. Ўшанда унинг умумий қуввати минг киловатт соатга етади. Бу эса ойлик электр энергияси тўловининг тенг ярмини қоплаши мумкин.

Ҳа, қуёш панеллари қўшимча даромад манбаидир.

<iframe width="650" height="420" src="https://www.youtube.com/embed/tUb4Wods54E" title="Quyosh panellari – daromad manbai" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Муҳаммаджон Обидов, Элёр Олимов (видео, сурат), ЎзА мухбирлари