Германияда шахмат бўйича давом этаётган “Grenke Freestyle Chess Open” халқаро турнирининг ортда қолган 5 та тур ўйинларидан кейин ФИДЕ рейтинги етакчиси норвегиялик Магнус Карлсен 5 очко билан етакчига айланиб олди.

Хўш, шундай вазиятда Германия баҳсларида қатнашаётган ҳамюртимиз Синдоров ушбу турнирда Карлсен билан тўқнаш келиши мумкинми?

Албатта, мумкин. Фақат турнир давомидаги ўйинларда омад Жавоҳирга кулиб боқса, мазкур “дуэль” рўй бериши ҳақиқатга яқин.

Турнир тафсилотларига тўхталадиган бўлсак, норвегиялик собиқ жаҳон чемпионини тақиб этаётган 7 нафар гроссмейстерлар: грузиялик Баадур Джобава, германиялик Маттиас Блюбаум, сербиялик Алексей Сарана, АҚШлик Авондер Лян, эронлик Пархам Мақсудлу, литвалик Паулюс Пултиневичус ва ҳиндистонлик Леон Люк Мендонса ҳисобида 4,5 очко мавжуд.

Турнирни катта иштиёқ билан бошлаган ҳамюртимиз Жавоҳир Синдоров кеча ўтказилган 3-турда дурангга эришган бўлса, 5-турда имкониятни бой берди.

Айтиш лозим, 4-турда ҳиндистонлик Пранеш билан кечган ўйинда Синдоров ғалабага эришиши ҳам мумкин эди. Бу, энг аввало, Жавоҳирнинг ўйинни оқ доналарда ўтказиши назоратни ўз қўлида ушлаб туришига таъсир кўрсатишидан далолатдек эди. Бироқ, 9-юриш ҳолатида ўйин тизгини қайсидир маънода рақиб томонга ўзгарди ва 32-юриш вазиятида шахматчилар муроса йўлини танлади.

5-турда Синдоров қора доналарда  латвиялик Паулюс Пултиневичусга рўбарў келди. Ушбу ўйинда ҳамюртимиз ўзидан рейтинг жиҳатдан анча пастда бўлган шахматчи билан куч синашаётганини ҳис қилган тарзда ҳаракатланди. Синдоровнинг ҳаддан ташқари ишончи эса 18-юриш ҳолатидаги хатоликка олиб келди. Айнан шу нуқтадан бошлаб доналарнинг жойлашув позициясида ютуқ тўлалигича оқ доналар томонга ўтиб кетди. Бундай қулай вазиятдан  латвиялик шахматчи унумли фойдаланди.

Шу тарзда ҳамюртимиз 5 та тур ўйинларидан сўнг 294 нафар иштирокчи орасида 3,5 очко билан 61-поғонада бормоқда.

Айтиш лозим, турнирда қатнашаётган шахматчиларнинг 22 нафари 4, 43 нафари 3,5 очкога эга бўлиб турибди.

Синдоров бугун ўтказиладиган 6 ва 7-турларда муносиб натижани қайд этса, сўнгги турларнинг бирида собиқ жаҳон чемпиони Магнус Карлсен ёки ғолибликка даъвогарлардан саналган Алексей Сарана, Пархам Мақсудлу, Фабиано Каруана каби кучлилардан бири  билан тўқнаш келиши эҳтимолдан йироқ эмас.

Бугун, 20 апрель куни ўтказиладиган 6-тур баҳсида Жавоҳир Синдоров оқ доналарда польшалик Мачей Клековскига қарши дона суради. Польшалик шахматчи ҳозирда 3,5 очко билан қўшимча кўрсаткичларга кўра, 49-қаторни банд этган.

9 турдан иборат турнирнинг якуний ўйинлари эртага, 21 апрель куни бўлиб ўтади.

Т.Рўзиев, ЎзА