Бугун Тошкентда “UzCharmExpo-EurAsia-2025” чарм, пойабзал, атторлик, мўйна ва қоракўл ҳамда маҳаллийлаштирилган маҳсулотлар 18-халқаро кўргазмасининг иккинчи кунги тадбирлари бўлиб ўтмоқда.

“Ўзчармсаноат” уюшмаси, Савдо-саноат палатаси, “Халқ банки” ҳамкорлигида ташкил этилган ушбу халқаро тадбирда Марказий Осиё ҳамда Италия, Туркия, Эрон, Хитой, Россия давлатларидан 200 га яқин компания иштирок этяпти. 

Мазкур кўргазма доирасида “Ўзчармсаноат” уюшмаси ўринбосари Мирсаид Зоҳидов Хитойнинг етакчи пойабзал ишлаб чиқарувчиларидан бири – “Gaffluence” компанияси вакиллари билан музокаралар олиб борди. 

[gallery-22866]

Музокаралар чоғида “Gaffluence” компанияси вакиллари Ўзбекистон чарм-пойабзал саноатига кириб келиш бўйича аниқ ва босқичма-босқич стратегиясини тақдим этди. 

Унга кўра, дастлабки босқичда компания маҳаллий корхоналар билан аутсорсинг асосида ҳамкорлик қилиб, ўзининг илғор технологиялари ва ишлаб чиқариш стандартларини жорий этишни режалаштирмоқда. Бу ҳамкорлик маҳаллий ишлаб чиқарувчилар учун юқори технологик тажриба, билим ва инновацияларни ўзлаштириш имконини яратади. Кейинги босқичда эса “Gaffluence”нинг мамлакатимизда тўлиқ ишлаб чиқариш базаси ташкил этилади. 

Учрашувда қайд этилганидек, ушбу ташаббус мамлакатга янги хорижий инвестициялар оқимини жалб қилиши, замонавий ускуналарни киритиши ва маҳаллий аҳоли учун янги иш ўринлари яратилишига кенг йўл очади. 

Н.Зиёдуллаева, Ойбек Пардаев (сурат), ЎзА