Айни пайтда Олий Мажлис Қонунчилик палатасининг навбатдаги мажлиси бўлиб ўтмоқда.

Мажлис аввалида Қонунчилик палатаси Спикери Н.Исмоилов шу йил 5-9 апрель кунлари Тошкент шаҳрида бўлиб ўтган Парламентлараро Иттифоқнинг 150-юбилей ассамблеяси ва унда Президентимиз томонидан илгари сурилган таклиф-ташаббуслар ҳақида тўхталиб ўтди.  

—  Юртимиз парламентлараро дипломатиянинг муҳим марказига айланди. Парламентлараро Иттифоқнинг 150-юбилей ассамблеясида давлатимиз раҳбари нутқ сўзлаб, бугунги кунда ўта долзарб бўлган ташаббусларни илгари сургани кенг эътироф этилмоқда. Президентимиз халқаро парламентлараро ҳамкорликнинг устувор йўналишларига алоҳида тўхталиб ўтди. Жумладан, глобал ва минтақавий низоларга халқаро ҳуқуқнинг умумэътироф этилган меъёрлари, БМТ Низоми ва резолюциялари асосида ечим топиш муҳимлиги қайд этилди. Иқлим ўзгариши, хотин-қизлар ҳуқуқлари, Парламентлараро Иттифоққа ёшларни кенг жалб этиш масалаларига доимий эътибор қаратиш лозимлиги ҳақида тўхталиб ўтилди.  

Давлатимиз раҳбарининг фундаментал таклифлари ассамблея иштирокчилари томонидан кенг эътироф этилиб, Парламентлараро Иттифоқнинг стратегияси ва мақсадларига тўла мослиги таъкидланди.  Шу боис бу ташаббуслар ассамблея якунида қабул қилинган Тошкент декларациясида тўла акс эттирилди.   

Тошкент ассамблеяси Парламентлараро Иттифоқ тарихида энг кенг кўламлиси, энг кўп делегатлар қатнашган ассамблея бўлгани билан жаҳон парламентаризмида муҳим босқич сифатида эътироф этилмоқда, — деди Спикер.  

Шунингдек, ассамблея доирасида Қонунчилик палатаси вакиллари томонидан 96 та давлат делегациялари билан учрашувлар ўтказилгани ва муайян келишувларга эришилгани айтиб ўтилди.  

М.Комилова, ЎзА