Тиббиёт доимий равишда ривожланиб, бугунги кунда ҳаётимизни сақлаб қолувчи янги инновацион ечимларни таклиф этмоқда. Айниқса, жарроҳлик амалиётлари ва шошилинч тиббий ёрдамда қон кетишини тез ва самарали тўхтатиш муҳим аҳамиятга эга.

Ўзбекистон олимлари ана шундай муаммони ҳал қилувчи инновацион тиббий восита – "Гемогубка"ни ишлаб чиқишди.  

Қон кетиши инсон ҳаёти учун энг хавфли ҳолатлардан биридир. Жарроҳлик операцияларида, шошилинч тиббий ёрдамда ёки турли шикастланишларда самарали қон тўхтатувчи воситалар эса жуда зарур.  

Ўзбекистон Фанлар Академияси Биоорганик кимё институти олимлари томонидан ишлаб чиқилган “Гемогубка” инновацион воситаси ушбу муаммога самарали ечим бўлиши мумкин.  

Маҳаллий қорамол терисидан ажратиб олинган, табиий коллаген асосида яратилган бу гемостатик қоплама қон кетишини тез тўхтатади, организм томонидан сўрилиб, шикастланган тўқималарнинг тикланишини тезлаштиради.  

Тадқиқотлар шуни кўрсатдики, “Гемогубка” капилляр ва паренхиматоз қон кетишларини самарали тўхтатиб, жароҳатни битказиш жараёнини тезлаштиради. Энг муҳим жиҳати, у организмга зарар етказмайди, яллиғланиш келтириб чиқармайди ва табиий коллаген ҳосил бўлишини рағбатлантиради.  

 Ҳозирда ушбу технология “EIRINE” МЧЖ томонидан ишлаб чиқарилмоқда ва ҳозирда Ўзбекистон Республикаси ҳамда халқаро стандартларга мос сертификатларга эга. Келгусида эса ушбу восита маҳаллий ва халқаро тиббиёт муассасаларида кенг қўлланилиши кутилмоқда.  

“Гемогубка” инновацион тиббий воситаси инсон ҳаётини сақлаб қолиш ва шифо беришда муҳим янгиликлардан бири бўлиб, келажакда жарроҳлик ва травматологияда инқилобий ўзгаришларга сабаб бўлиши мумкин.  

Муҳими, маҳсулот маҳаллий ишлаб чиқарилган бўлиб, беморлар учун ҳам қулай ва хавфсиздир.

“Ихтиро” лойиҳасида батафсил маълумотга эга бўлинг.

<iframe width="650" height="430" src="https://www.youtube.com/embed/8nL9FAt1OTE" title="Import emas, endi oʻzimizniki! Mahalliy qoramol terisidan tibbiy moʻjiza yaratildi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

М.Эшмирзаева, Д.Якубов, А.Содиқов У.Тўхтаев, ЎзА