Яқинда “Ўзбекнефтгаз” акциядорлик жамияти делегацияси Бирлашган Aраб Aмирликларининг Абу Даби ва Дубай шаҳарларида хизмат сафари билан бўлиб, қатор халқаро инвесторлар ва молия институтлари билан музокаралар ўтказди.

Ташриф доирасида делегация халқаро банклар, институционал инвесторлар ва йирик молиявий компаниялар вакиллари билан мулоқотлар олиб борди.  

Музокараларда БААнинг етакчи молия ва инвестиция ташкилотлари - “Abu Dhabi Investment Authority” (ADIA), “First Abu Dhabi Bank”, “Abu Dhabi Commercial Bank”, “Abu Dhabi Fund for Development” (ADFD), “Mashreq Capital”, “Market Securities”, “Arqaam”, “BHM Capital” ҳамда “Brevan Howard” каби нуфузли компаниялар иштирок этди.

Учрашувларда “Ўзбекнефтгаз” АЖ томонидан сўнгги йилларда амалга оширилган ислоҳотлар, йирик инвестиция лойиҳалари, молиявий барқарорликни таъминлашдаги натижалар ва компаниянинг келгусидаги стратегик режалари ҳақида батафсил маълумот берилди.

Шунингдек, томонлар соҳадаги долзарб янгиликлар, глобал энергетика бозоридаги тенденциялар, инвестиция муҳити ва истиқболли ҳамкорлик йўналишлари юзасидан фикр алмашдилар.

Жамият ахборот хизматининг маълум қилишича, мазкур мулоқотлар “Ўзбекнефтгаз” АЖнинг халқаро молия бозоридаги мавқеини мустаҳкамлаш, тўғридан-тўғри хорижий инвестицияларни жалб этиш ҳамда узоқ муддатли ҳамкорликни йўлга қўйишда муҳим аҳамият касб этади.

Н.Зиёдуллаева тайёрлади, ЎзА