Тайланднинг Бангкок шаҳрида Кикбоксинг бўйича Жаҳон кубоги ўтказилди. Унда Ўзбекистон терма жамоаси 34 та олтин, 26 та кумуш ва 18 та бронза, жами 78 та медални қўлга киритиб, умумжамоа ўртасида иккинчи ўриндан жой олди.

Шуни таъкидлаб ўтиш лозимки, мусобақа давомида Хуршида Жалилова бир мусобақанинг ўзида 4 карра Жаҳон кубоги соҳибасига айланди. Аниқроғи, у “Point Fighting”, “Light Contact” ва “Kick Light” йўналишларида энг яхши натижани қайд этди. Юсуфбек Эркинов эса икки йўналишда олтин медалга сазовор бўлган бўлса, терма жамоамиз учун яна иккита тоифада кумуш медаллар келтирди.

Шунингдек, Фузайл Содиқов “Low Kick” йўналишида 4 та олтин медалга эга чиққан бўлса, Жаҳонгир Турсунов ўз фаолиятида илк бор жаҳон кубогида иштирок этиб, зафар қучди. “Gala final” жангларида Фахриддин Эминова ва Аброрбек Мусаев ғалаба қозонди.  Қолаверса, бир қатор иқтидорли ёш совриндорларимиз турли йўналишларда ғолиб ва совриндорлар қаторидан жой олди.

Жавоҳир Тошхўжаев, ЎзА