Парламентлараро иттифоқнинг Тошкент шаҳрида ўтказилган 150-юбилей ассамблеяси нафақат долзарб масалалар муҳокамаси, балки дўстона руҳи билан тарих зарварақларидан ўрин олди.

Ўзбекистон Президентининг дунёда тинчлик ўрнатишга оид фикрлари иштирокчиларнинг кўнглидаги гап бўлгани учун ҳам қизғин қўллаб-қувватланди. Якунда жаҳон парламентларидан келган халқ вакиллари ўзларининг бирдамлиги билан бу нотинч дунёга дўст бўлиб кўп нарсага эришиш мумкин, деган эзгу сўзини айтди. 

ЎзА мухбири ассамблея якунида Қозоғистон Республикаси Парламенти Мажлиси қуйи палатаси Халқаро ишлар ва хавфсизлик масалалари қўмитаси раиси Айгул Қуспан билан шу ҳақда суҳбатлашди: 

– Парламент аъзоси сифатида жуда тадбирларда иштирок этганман. Лекин, Тошкентда ўтказилган ассамблеядек юксак савияда ўтказилган тадбирни, тўғриси, бошқа жойда кўрмаганман. Ташкилий ишлар жуда юқори савияда бўлган. Ҳар бир мажлис, учрашув ва иштирокчилар билан боғлиқ ҳар бир ҳолат эътиборга олинган. 

Юксак даражада меҳмондўстлик кўрсатдингиз. Юзлаб давлатлардан келган иштирокчилар буни ҳайрату ҳавас билан эътироф этди. 

Муҳими, ассамблея давомида жуда мазмунли ва долзарб масалалар кўтарилди. “Ижтимоий тараққиёт ва адолат учун парламент ҳаракати” мавзусида ўтказилган ассамблея доирасида ижтимоий тараққиётга эришиш, адолатли жамиятни барпо этишда парламентлар иштирокини кенгайтириш ва фаоллигини оширишга қаратилган турли тадбирлар ва дебатлар ташкил этилди. 

Ассамблея доирасида Тинчлик ва халқаро хавфсизлик масалалари бўйича доимий қўмитага раҳбарлик қилдим. Фаластиндаги вазият эътибор марказимизда бўлди. Тегишли резолюцияни ишлаб чиқдик. 

Президент Шавкат Мирзиёевнинг чиқиши ассамблеяга алоҳида мазмун киритди. Иштирокчиларга бу нутқ жуда катта илҳом берди. Унинг ҳар қандай масалани келишув асосида, мулоқот орқали ҳал қилишга оид ташаббуси барчамизнинг кўнглимиздаги гап бўлди. Бу нарсалар тегишли низомларда акс этиши, барча унга амал қилиши ҳақидаги фикрлар илгари сурилди. 

Барча ассамблея иштирокчилари бу фикрларни қўллаб-қувватлаб, ўзаро муҳокамаларда буни қайта-қайта тилга олди. Президент Мирзиёев тўғри айтди, деган фикрни жуда кўпчиликдан эшитдим. 

Тошкент ассамблеяси жараёнида биз, қозоғистонликлар, ўзбек бавурларимиз билан фахрландик. Ахир, тарихий воқелик бўлди ва буни Ўзбекистон шараф билан бажарди.

Парламентлараро иттифоқ тузилганига юз йилдан ошган, аммо бу ташкилот Марказий Осиёда илк марта ўзининг йирик тадбирини ўтказди. Бу Ўзбекистон, унинг беқиёс пойтахти Тошкент шаҳрига насиб қилди. 

Шу кунларда, наздимда, Яратган ҳам Тошкентга назар солди. Чунки об-ҳаво ҳам ниҳоятда ёқимли бўлди. 

Кўп иштирокчилар бу ерга илк марта ташриф буюрди. Ўзбекистон жуда кароматли ўлка экан, деган иқрорларни эшитдим. Бу мамлакат сизнинг қўшнингиз, у ривожланиб бораётган давлат экан, деган фикрларни менга ҳам билдиришди. 

Биз, нафақат яқин қўшни, балки қардош ва яқин дўст халқлармиз. Бунда, Президентларимиз саъй-ҳаракатлари ҳам беқиёс. Мирзиёев ва Тоқаев бир-бирини жуда яхши тушунади. Қардош икки элнинг муносабатлари яхши бўлишида уларнинг хизматлари катта.

Биз – депутатлар ҳамкорлик бўйича эришилган келишувларни амалга ошириш учун бор кучимиз билан ҳаракат қиляпмиз.

<iframe width="650" height="420" src="https://www.youtube.com/embed/Qwf4SKpVS-c" title="Aygul Quspan: Toshkent assambleyasi jarayonida oʻzbek bovurlarim bilan chin yurakdan faxrlandim" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Норгул Абдураимова, Дониёр Якубов (видео), Анвар Аҳмедов (монтаж), ЎзА