“Ўзархив” агентлигида агентлик директори Улуғбек Юсупов ҳамда Тожикистон Республикасининг мамлакатимиздаги Фавқулодда ва мухтор элчиси Раҳмонзода Абдужаббор бошчилигидаги делегация аъзолари билан учрашув бўлиб ўтди.

Учрашувда “Ўзархив” агентлиги ва Тожикистон архивлари ўртасида архив соҳасидаги ҳамкорлик истиқболлари муҳокама қилинди. Ўзбекистон тарихи ва маданиятини, архив ҳужжатларини Тожикистон архивларида тарғиб этиш, ҳужжатларни рақамлаштириш, қўшма кўргазмалар ва нашрлар ташкил этиш, архивларда тадқиқотчиларга кўмак кўрсатиш бўйича ҳамкорликдаги масалалар кўрилди.

Ташриф сўнгида архив музейи ва кўргазмалар залида қизиқарли экскурсия уюштирилиб, меҳмонлар музейдаги ноёб архив ҳужжатлари ва экспонатлари билан таништирилди. Архивдаги шарт-шароитлар меҳмонларда катта таассурот қолдирди, келгусида ҳамкорликни янада ривожлантириш режалаштирилди.

Гулноза Бобоева, ЎзА