Гулистон туман ҳокимлигида вилоят ва республика миқёсида ўтказилган фан олимпиадаларида иштирок этиб, совринли ўринларни қўлга киритган, туман нуфузини кўтаришга ўзининг муносиб ҳиссасини қўшаётган иқтидорли ўқувчилар рағбатлантирилди.

Иқтидорли болаларни рағбатлантириш, уларнинг ижодий салоҳиятини ривожлантириш мақсадида ўтказилган мазкур тадбирда Самарқанд шаҳридаги "Нурли маскан" ихтисослаштирилган мактаб-интернатлари ўқувчилари ўртасида ўтказилган асосий фан олимпиадасининг республика босқичида иштирок этиб, рус тили ва адабиёти фанидан 1-ўринни эгаллаган тумандаги 11-сонли "Нурли маскан" мактаб-интернати ўқувчиси Ирода Кушаева, Бирлашган Араб Амирлигининг Дубай шаҳрида бўлиб ўтган "Ментал арифметика" бўйича халқаро олимпиадада Қирғизистон, Тожикистон, Қозоғистон, БАА, Арманистон, Ҳиндистон ва Саудия Арабистони каби давлатлардан ташриф буюрган 400 нафардан ошиқ тенгдошларидан устун келиб, "Супер чемпион" мақомига эришган 31-сонли умумтаълим мактаб ўқувчиси Эъзоза Эгамқулова ва бошқа иқтидорли, изланувчан, интилувчан ўқувчиларнинг муваффақиятлари эътироф этилиб, ғолибликни қўлга киритган ўқувчилар туман ҳокимлигининг ташаккурномаси ва эсдалик совғалари билан тақдирланди.

Ўтказилган тадбирда туман ҳокими вазифасини бажарувчи Олимжон Жўраев иштирок этиб, ҳар томонлама интилувчан ва билимга чанқоқ болаларга муваффақиятлар тилади.

Бу эса ёш иқтидор соҳибларига ўқиб-ўрганишлари, ўз иқтидорларини намойиш этишлари, нафақат республика, балки халқаро мусобақаларда иштирок этиб, ғолибликни қўлга киритишларида шижоат бағишлади.

Ғулом Примов, ЎзА мухбири