Эрон Ислом Республикаси IRNA ахборот агентлиги "Пезешкиён: Эрон ва Ўзбекистон муносабатлари мустаҳкамланишини интиқлик билан кутамиз" сарлавҳали мақола эълон қилди.

Мақолада Ўзбекистон Республикаси Президенти Шавкат Мирзиёев ва Эрон Ислом Республикаси Президенти Масъуд Пезешкиён 1 апрель куни бўлиб ўтган телефон орқали мулоқотда бир-бирларини, мамлакатларимизнинг дўст халқларини баҳор айёми Наврўз ва муборак Рамазон ҳайити – Ийд ал-Фитр билан самимий қутлаб, тинчлик-осойишталик, фаровонлик ва равнақ тилаганлари баён этилган.

Шунингдек, турли даражаларда фаол мулоқот ва ташрифлар давом этаётгани мамнуният билан қайд этилгани, ўзаро савдо ва юк ташиш кўрсаткичи, қўшма корхоналар сони ошаётгани, пойтахтлар ўртасида мунтазам тўғридан-тўғри авиақатнов амалга оширилаётгани, ишбилармонлик ва маданий-гуманитар алмашинув кенгайиб бораётгани эътироф этилган.

– Пезешкиён таъкидлашича, Эрон халқларимиз ўртасидаги маданий, диний ва цивилизация муштараклигига асосланиб, икки давлат манфаати йўлида иқтисодий, сиёсий ва маданий алоқани мустаҳкамлашга интилади, – дейилган мақолада.

Шунингдек, Ўзбекистон етакчиси Эрон Президенти ва халқини футбол бўйича миллий терма жамоа жаҳон чемпионатига муддатидан олдин йўлланма олгани билан табриклаганига ҳам эътибор қаратган.

Муҳаррама Пирматова, ЎзА