Жорий йил 14 февралда давлатимиз раҳбарининг мамлакатимиз ёшлари билан тарихий учрашуви бўлиб ўтди. Унда Президентимиз “Мамлакат ёшларини – халқимизнинг, Ватанимизнинг олтин фонди” эканлигини таъкидлаб, келгусида Учинчи Ренессанс пойдеворини айнан Янги Ўзбекистон ёшлари яратишига ишонч билдирди.

Мазкур учрашувда белгилаб берилган муҳим йўналишлардан келиб чиқиб, жорий йилда Қашқадарё вилоят ёшлар ишлари бошқармаси томонидан амалга оширилиши мўлжалланган бир қатор устувор вазифалар белгилаб олинган.

Бу ҳақда вилоят ёшлар ишлари бошқармаси бошлиғи А.Аҳмедов ҳудуд ёшларига қилган мурожаатида маълумот берди.  

А.Аҳмедов мурожаатида асосий эътиборни ишсиз ёшлар бандлиги таъминлаш, хорижий тиллар ва IT соҳаларига ўқитишга қаратилишини таъкидлаб ўтди.

[gallery-22611]

Хусусан, масъулнинг қайд этишича, жорий йил давомида маҳаллалар кесимида тадбиркорликка хоҳиши баланд 1 минг 250 нафар ёшнинг рўйхати шакллантирилади. Хорижда ишлаш истагидаги ёшлар билан янгича механизмларни жорий этиб, 471 нафар ёш хорижий тиллар ва касбга ўргатилади. 4 минг 904 нафар ёшга “Ёшлар дафтари” имкониятларидан амалий ёрдам кўрсатилади. “Бир миллион дастурчи” лойиҳасига қўшимча 20 минг ёш ўқитилади. Деҳқончилик қилиш мақсадида ер ажратилган 7 минг 173 нафар ёш ҳар томонлама қўллаб-қувватланади. 

2 минг 800 нафар ёш чет тилларига ўқитилади ва сертификат билан таъминланади. Хорижда ишлаш истагида бўлган ёшларни тартибли ва хавфсиз жўнатиш бўйича ҳудудларда хатлов ўтказилиб, минг нафар фуқаронинг “меҳнат миграцияси баланси” шакллантирилади. Ёшларни касб ва тилга ўқитиб, юқори даромадли ишларга жойлаштириш мақсадида бу йил салкам 22 минг нафар аҳолини банд қилиш бўйича катта дастур қабул қилинади. Ушбу чора-тадбирлар орқали эса вилоятда ишсиз ёшлар сони икки карра камайтиришига эришилади. “Ишсизликдан холи маҳаллалар” сонини эса 98 тага кўпайтириш режа қилинган.

Ўлмас Баротов, Жамшид Норқобилов (сурат), ЎзА мухбири.