Япониянинг Токио шаҳрида кардиология соҳасидаги энг нуфузли халқаро тадбирлардан бири – 89-Халқаро кардиологлар конференцияси (JCS 2025 Annual Meeting) бўлиб ўтди. Унда дунёнинг етакчи олимлари, шифокорлар ва соҳа мутахассислари билан бирга Ўзбекистондан ташриф буюрган кардиолог олимлар ҳам муносиб иштирок этди.
Жумладан, Ўзбекистон Республикаси Соғлиқни сақлаш вазирлиги тасарруфидаги Республика ихтисослаштирилган кардиология илмий-амалий тиббиёт марказининг ёш ва иқтидорли олимаси, етакчи шифокор Зарина Машкурова ўз илмий иши доирасидаги тўлқин тезлигини аниқлаш масалалари юзасидан муваффақиятли тақдимот қилди.
Айтиш жоизки, ҳамюртимизнинг “Азилсартан ва индапамид ёки нитрендипин комбинацияси артериал гипертонияда импульс тўлқини тезлигига қандай таъсир қилади?” мавзусидаги маърузаси конференция иштирокчиларининг алоҳида эътиборига сазовор бўлди.
Тадқиқотда артериал гипертонияга чалинган беморларда импульс тўлқини тезлиги (Pulse Wave Velocity – PWV) орқали юрак-қон томир тизимининг ҳолатини баҳолаш ва бу кўрсаткичлар орқали беморларнинг индивидуал терапиясини шакллантириш масалалари қамраб олинган.
Зарина Машкурованинг тадқиқоти аниқлиги, методикасининг пухталиги, статистик таҳлилнинг юқори даражаси ва клиник аҳамияти нуқтаи назаридан Япония, Жанубий Корея, Германия ва бошқа давлатлардан келган соҳа мутахассисларининг эътиборини тортди.
– Анжуманда хорижлик ҳамкасблар билан тажриба алмашиш имконияти биз, ўзбекистонлик ёш олимлар учун жуда муҳим аҳамиятга эга бўлди. Шунингдек, тадбирнинг юқори ташкилий даражада ўтказилгани ва япон мезбонларнинг самимий муносабати бизда ижобий таассурот қолдирди, – деди Зарина Машкурова. – Аҳамиятлиси, мамлакатимиз кардиологларининг бундай халқаро анжуманлардаги фаол иштироки юртимиз тиббиётининг жаҳон ҳамжамиятидаги нуфузини ошириш билан бирга, ёш олимларимиз учун ҳам янги ва истиқболли имкониятларни очиб беради.
Зарина Машкурова каби иқтидорли шифокорларнинг бу каби конференцияларда қатнашиши эса миллий илм-фанимиз ютуқларини халқаро даражада кенгроқ намойиш этиш йўлидаги муҳим қадамлардан бири ҳисобланади.
ЎзА