Фарғона вилояти Қўқон шаҳар Нурафшон маҳалласида дўстлик ва ҳамжиҳатликни мустаҳкамлашга қаратилган “Қўшничилик –минг йилчилик” шиори остида маънавий-маърифий ва маданий тадбир ўтказилди.

Тадбирда амалий санъат ва ҳунармандчилик буюмлари кўргазмалари ташкил этилди. "Жонли устахона" форматида гиламдўзлик, заргарлик, кулолчилик ва ёғоч ўймакорлиги каби ҳунармандчилик йўналишлари намойиш қилиниб, меҳмонларга ўз қўллари билан миллий безаклар тайёрлаш имконияти яратилди.

Миллий ўйинлар – "Оқ теракми – кўк терак", "Куч синаш", "Арқон тортиш", "Чиллак", "Юртим полвонлари" мусобақалари ўтказилди. Шунингдек, дорбозлар чиқишлари ва "Варраклар сайли" ташкил қилинди.

"Наврўз учун 10 000 табассум" хайрия акцияси доирасида етим болалар, ногиронлиги бор инсонлар ва кам таъминланган оилаларга совғалар топширилди.

Турли миллий- маданий марказ вакилларининг фольклор-этнографик ансамбллари бадиий чиқишлар қилди.

Маҳалла аҳолиси учун эҳсон тадбирлари ташкил этилиб, уйидан чиқа олмайдиган беморлар ва кекса авлод вакилларининг ҳолидан хабар олинди.

Шунингдек, тадбирлар доирасида маҳаллаларда ободонлаштириш ишлари олиб борилди, “Обод хонадон” мезонлари жорий этилди, қабристон ва зиёратгоҳлар тозаланди, аҳоли томорқаларидан самарали фойдаланиш мақсадида томорқаларга сув чиқариш ишлари олиб борилди.

Муҳаммаджон Обидов, ЎзА