Энергетика объектларида хавфсизлик қоидаларига амал қилмаслик бахтсиз ҳодисаларга сабаб бўлиши мумкин. Шунинг учун “Ўзэнергоинспекция” томонидан таъмирлаш ишлари доимий назоратга олинмоқда.

Жорий йилнинг биринчи чорагида 69 та бригада хавфсизлик техникаси қоидаларини бузгани аниқланди. Улар ташкилий ва техник чораларни бажармасдан, хавфсизлик талабларига зид равишда иш ташкил этган. Шу сабабли, бу бригадалар ишдан четлатилди, яна 36 та бригадага интизомий чоралар кўрилди.

Шунингдек, Тошкент вилоятида ўтказилган текширувлар давомида “B.G.E.” ва “S.O.“ МЧЖларга қарашли АЁҚШларда сотилаётган AI-92 маркали автобензин сифатини текшириш мақсадида лаборатория таҳлиллари ўтказилди. Натижада ёқилғи давлат стандарти талабларига жавоб бермаслиги аниқланди.

Ушбу қонунбузарлик учун реализация қилинган товар қийматининг 50 фоизи миқдорида иқтисодий санкция қўлланилди. Шунингдек, сифатсиз ёқилғини сотувга чиқармаслик ва унинг сифати тикланиши кераклиги ҳақида кўрсатма берилди.

Бундан ташқари, Самарқанд вилоятида ўтказилган назорат тадбирида “A.F.F.“ якка тартибдаги тадбиркорга қарашли бинода электр энергиясидан ноқонуний фойдаланиш ҳолати аниқланди. Тадбиркор шартнома расмийлаштирмасдан электр тармоғига уланган.

Инспекция ахборот хизматига кўра, бу қонунбузарлик туфайли электр таъминоти корхонасига 539,2 миллион сўм зарар етказилган. Ҳозирда ҳуқуқни муҳофаза қилувчи органлар текширув ишларини олиб бормоқда.

Н.Зиёдуллаева тайёрлади, ЎзА