Ўзбекистон Республикаси Бош вазири ўринбосари - иқтисодиёт ва молия вазири Жамшид Қўчқоров Осиё тараққиёт банки (ОТБ) Марказий ва Ғарбий Осиё департаменти бош директори Евгений Жуков бошчилигидаги делегация билан учрашди.

Учрашувда Ўзбекистон ва ОТБ ўртасидаги ҳамкорликни янада ривожлантириш масалалари муҳокама қилинди. Музокаралар давомида кичик ва ўрта бизнесни ривожлантириш стратегияси, давлат бюджетига кўмак бериш, таълим, энергетика, транспорт, сув таъминоти ва шаҳарсозлик йўналишларидаги лойиҳаларни кенгайтириш масалалари кўриб чиқилди. 

Шунингдек, экологик трансформация ва барқарор ривожланиш бўйича янги ташаббуслар муҳокама қилинди. Энергия самарадорлигини ошириш мақсадида “super ESCO” тизимини жорий этиш масаласи ҳам кун тартибига киритилди. 

Вазирлик ахборот хизматининг хабар беришича, ушбу мулоқот доирасида ОТБ ва Ипотекани қайта молиялаштириш компанияси ўртасида ҳамкорликни ривожлантириш бўйича шартнома имзоланди.

Учрашув якунида томонлар мавжуд ҳамкорликни янада ривожлантириш, янги лойиҳаларни қўллаб-қувватлаш ва техник ёрдам доирасидаги ҳамкорликни мустаҳкамлаш борасида келишувга эришди.

Н.Зиёдуллаева тайёрлади, ЎзА