Эътироф

Ўзбекистон Республикаси Президентининг Франция Республикасига тарихий давлат ташрифи икки мамлакат ўртасида стратегик шериклик муносабатларини янада мустаҳкамлашга хизмат қилади. Мазкур ташрифнинг аҳамияти хусусида Ўзбекистон халқ шоири, Ёзувчилар уюшмасининг Тошкент вилояти бўлими раиси Маҳмуд Тоир ЎзА мухбирига қуйидагиларни баён қилди. 

– Бу ташриф, албатта, эзгуликка хизмат қилади. Президентимизнинг ҳар бир сўзи, аввало, дўстликка, бирликка ва тинчликка чорлов эканини бугун дунё халқлари англаб етди. Менинг назаримда ҳар бир инсонга кўрсатилган эҳтиром, аввало, ўз сўзига эгалигида, аҳдига вафо қилишида, берган ваъдаларини ўз вақтида бажариб қўйишида кўринади. 

Давлатимиз раҳбари илгари 2018 ва 2022 йилларда ҳам бу давлатга ташрифи давомида ҳам қатор келишилган шартномалар, кўплаб соҳаларда тузилган битимлар ўтган йиллар давомида тўлиқ ижобатини топди. Президентимиз иш бошлаган дастлабки йилларда айтган бир гапи мени қалбимда ҳамиша жаранглаб туради. “Биз эргашувчи эмас, эргаштирувчи халқмиз...”. 

Ҳақиқатда ҳам мана шу бобомерос қадриятларимизни, ўзбек халқининг қадрини бутун дунёда тиклашга муваффақ бўляпти. Дарҳақиқат, бу саъй-ҳаракатлар биринчи галда Марказий Осиёда эътироф қилинмоқда. Бу галги ташрифда Президентимиз Франция билан савдо-иқтисодий алоқаларни янада кенгайтириш муҳимлигини таъкидлагани бежизга эмас. Буни биз Франция компаниялари билан 2027 йилгача бўлган даврга мўлжалланган инновацион ва саноат кооперацияси дастури бунга хизмат қилишида тушунамиз. Унга умумий қиймати 6,5 миллиард евро бўлган аниқ йўналиш ва лойиҳалар киритилди. 

Ўз навбатида Франция Президентининг жуда катта ифтихор билан бугун бутун матбуот ва ижтимоий тармоқларда тарқалаётган “Яшасин Ўзбекистон, яшасин Франция!” гаплари она тилимизга эҳтиромидир. Бу ўзбек халқининг кўксини тоғдек кўтарганидан далолат. Президентимизнинг Франция Республикасининг олий мукофоти – Фахрий легион ордени билан тақдирланишида ҳам катта маъно бор. Дунёда ўзининг оқил сиёсати билан, самимий ва амалий ташаббуслари билан, умум-халқлар бирлиги-дўстлигига чақириқлари учун бу мукофотни ҳозиргача ўн киши олгани кўп бор айтилмоқда. Ўн биринчиси эса давлатимиз раҳбари бўлди. 

Ўз вақтида Франция президенти Шарль де Голль, Буюк Британия собиқ Бош вазири Уинстон Черчилл, Сингапурни жаҳонга танитган Ли Куан Ю, француз ёзувчиси Александр Дюма, инсоният тарихида биринчи марта коинотга парвоз қилган Юрий Гагарин кабиларга бу орден берилган эди. 

Мени назаримда бу мукофот биринчи галда ҳар биримизга, миллатимизнинг барча фарзандларига катта масъулият юклайди. 

А.Мусаев, ЎзА