Бугун Тошкентдаги “Ўзэкспомарказ” марказий кўргазмалар мажмуида “AgroWorld Uzbekistan-2025” йигирманчи халқаро кўргазмаси очилди.
“Iteca Exhibitions” халқаро кўргазма компанияси ва унинг ҳамкори “ICA Eurasia Group” томонидан маҳаллий ҳамкорлар кўмагида ташкил этилган ушбу кўргазмада 23 мамлакатдан 130 дан ортиқ компания иштирок этмоқда.
Кўргазма очилишида қишлоқ хўжалиги Ўзбекистон ялпи ички маҳсулотини ташкил этишда етакчилик қилаётгани ва маҳсулот ишлаб чиқаришнинг барқарор ўсиш суръатларига эришилаётгани қайд этилди.
Таъкидлаш керакки, “AgroWorld Uzbekistan” агросаноат соҳасида муҳим тадбир бўлиб, бу йил у ўзининг юбилейини нишонламоқда. Кўргазма қишлоқ хўжалигида инновациялар ва замонавий трендларни тақдим этиш, уларни ишлаб чиқаришга жорий этиш, маҳаллий бизнесни ривожлантириш ва экспортни кенгайтириш учун ишончли платформа сифатида намоён бўлди. 2006 йилдан буён кўргазмада 43 мамлакатдан 1 минг 846 компания иштирок этган.
[gallery-22191]
“Iteca Exhibitions” халқаро кўргазма компанияси бош директори ўринбосари Ойимхон Бобожонованинг сўзларига кўра, кўргазмаларни ташкил этишдаги ижодий ёндашув, саноат ҳамда бозор эҳтиёжларини батафсил ўрганиш “AgroWorld Uzbekistan”нинг самарали концепциясини белгилаб берди.
– Шундай қилиб, мутахассислар бутун ишлаб чиқариш занжири: қишлоқ хўжалиги экинларини етиштириш ва чорва моллари ҳамда паррандаларни кўпайтиришдан тортиб, йиғим-терим, қайта ишлаш ва сақлашгача бўлган жараёндаги асбоб-ускуналар ва технологиялар билан танишиш имкониятига эга бўлади. Бу йил кўргазмада Ўзбекистон, Бельгия, Венгрия, Германия, Дания, Ҳиндистон, Испания, Италия, Қозоғистон, Хитой, Корея Республикаси каби мамлакатлардан 130 дан ортиқ компания ўз имкониятларини тақдим этмоқда. Анъанага кўра, Туркия 12 та компаниядан иборат миллий стендни намойиш қиляпти. Япониянинг ташқи савдони ривожлантириш ташкилоти (JETRO) кўргазмада илк бор иштирок этмоқда, бу эътиборга лойиқ воқеадир. У агросаноат сектори учун инновацион ечимларни таклиф этувчи 13 та етакчи япон компаниясининг имкониятлари ва манфаатларини намоён этади. Кўргазманинг бошқа дебютантлари орасида Испаниянинг “Agricola” корхонаси меваларни саралаш ва қайта ишлаш, Италиянинг “ROTA GUIDO” компанияси эса тайёр чорвачилик фермаларини қуриш ускуналарини ҳавола этяпти, – деди О.Бобожонова.
Анъанага кўра, кўргазманинг иккинчи куни, 12 мартда Фермерлар куни тадбири ўтказилади. Унда кўргазма иштирокчилари фермер ва деҳқон хўжаликлари раҳбарлари ҳамда бош мутахассислари билан учрашадилар.
Насиба Зиёдуллаева, Ойбек Пардаев (сурат), ЎзА