“Ўзбекистон–2030” стратегиясининг “Атроф-муҳитни асраш ва “яшил иқтисодиёт” йилида амалга оширишга оид давлат дастурида 2025 йилда “яшил иқтисодиёт” тамойилларини кенг жорий қилишга, иқтисодиётни декарбонизация қилиш, иқлим ўзгариши оқибатларини юмшатиш ва унга мослаштиришга қаратилган лойиҳаларни барқарор молиялаштиришга алоҳида эътибор берилган. Ушбу жараёнларда халқаро ташкилотларнинг ҳам иштироки муҳим аҳамиятга эга.

Жумладан, БМТнинг Озиқ-овқат ва қишлоқ хўжалиги ташкилоти (ФАО) ҳамда Қишлоқ хўжалиги вазирлиги билан ҳамкорликда ерлар ва яйловларни барқарор бошқаришга кўмаклашишга  бўйича йирик лойиҳа амалга оширилмоқда. Гап шундаки “Ўзбекистонда қурғоқчиликка учраган экотизимлардаги ўрмонлар ва яйловларни барқарор бошқариш” лойиҳасига Глобал экологик фонддан 3.8 миллион доллар ажратилган бўлиб, бу долзарб экологик муаммоларни ҳал қилишга қаратилгандир.  

Ушбу лойиҳа Бухоро ва Навоий вилоятларини қамраб олади ҳамда асосий эътибор Жондор ва Нурота туманларида яйловлар маҳсулдорлиги ошириш, 13 минг гектар деградацияга учраган ерларни тиклаш ва қўшимча 225 минг гектар майдонда иқлимга чидамли ерларни бошқариш усулларини жорий этиш бўйича ишлар олиб борилади.  

[gallery-21851]

Шу муносабат билан пойтахтимизда лойиҳани амалга оширишни жадаллаштиришга бағишланган халқаро анжуман бўлиб ўтди. Унда асосий ташаббуслар белгилаб олиниб, ҳамкорлик мажбуриятларига алоҳида тўхталиб ўтилди.  

Йиғилишда Қишлоқ хўжалиги вазирлиги ва Экология, атроф-муҳитни муҳофаза қилиш ва иқлим ўзгариши вазирлиги раҳбарлари, Ўрмон хўжалиги агентлиги ва халқаро ташкилот вакиллари, соҳа экспертлари иштирок этди.

Тадбирда таъкидланганидек, лойиҳа такомиллаштирилган миллий дастурлар орқали келажакда юзага келиши мумкин бўлган қурғоқчиликнинг олдини олиш, барқарор қишлоқ хўжалиги амалиётлари орқали жорий йўқотишларни камайтириш ва етказилган зарарни бартараф этиш учун экотизимларни тиклаш мақсадларини кўзда тутади.  

<iframe width="640" height="420" src="https://www.youtube.com/embed/oeSZAGZnF6Q" title="Yerlar degradatsiyasini kamaytirishga qaratilgan yirikloyiha" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Мазкур лойиҳанинг амалга оширилиши таҳминларга кўра 6.1 миллион тонна карбонат ангидрид эмиссиясини камайтиради, шунингдек, жойларда сут маҳсулотлари, асаларичилик ва доривор ўсимликлар етиштиришда хўжаликларнинг шароитларини яхшилашга хизмат қилади.  

Тадбирда яна бир муҳим масала, Ўзбекистонда қум ва чанг бўронлари таъсирини камайтириш, атмосферани моделлаштириш йўналишидаги тақдимотлар ҳам бўлиб ўтди.             

Санжар Тошпўлатов, Аслиддин Алижонов, Улуғбек Тўхтаев (видео), ЎзА