Самарқанд халқаро аэропорти ўз мавқеини мустаҳкамлаб, нуфузли “ACI Europe” рейтингида йилига 1 миллиондан 10 миллионгача йўловчи ташишга мўлжалланган аэропортлар орасида 2-ўринни эгаллади. Бу ҳақда “Air Marakanda” авиакомпанияси маълум қилди.

Европа аэропортлари халқаро кенгаши (Airports Council International, ACI Europe) маълумотларига кўра, Самарқанд аэропорти 2019 йилга нисбатан йўловчилар оқимининг +186 фоиз ўсишини қайд этган.

Бу натижа нафақат мамлакат авиация тармоғининг жадал ривожланаётгани, балки Самарқандга бўлган сайёҳлик қизиқиши ортиб бораётганига яққол мисол бўлади.

Шунингдек, 2024 йилда аэропорт 1,38 миллиондан ортиқ йўловчига хизмат кўрсатиб, ўз фаолияти тарихидаги энг юқори натижага эришди. Бу 2023 йилдаги рекорд натижадан 37 фоиз юқоридир.

Айни пайтда Самарқанд халқаро аэропортининг замонавий терминалини “Air Marakanda” авиакомпанияси бошқаряпти ва у 17 та компания билан ҳамкорлик қиляпти. Ҳозирги кунда бу ердан 18 та йўналиш бўйича парвозлар амалга оширилмоқда. Улардан 16 таси халқаро, 2 таси ички авиақатновлардир.

Н.Зиёдуллаева, ЎзА