Паркент туманининг олис “Янги Санганак” маҳалла фуқаролар йиғинида аҳоли мурожаатлари билан ишлаш, жойига чиққан ҳолда ижтимоий ҳолатларини ўрганиш ва тиббий кўриклар ташкил қилиш борасида амалий тадбирлар ўтказилди.

Ҳудудда 1 минг 740 нафар аҳоли истиқомат қилиб, асосан боғдорчилик ва деҳқончилик билан шуғулланади. Ўтган даврда 59 фуқарога деҳқончилик қилиш учун узоқ муддатга ер ажратилди. Шу билан бирга, чорвачилик, паррандачилик ва асаларичилик билан банд бўлганлар сони 200 дан зиёдни ташкил этади. Маҳаллада ногиронлиги бўлган шахслар 45 нафарни, “Аёллар дафтари”га киритилган хотин-қизлар 36 нафарни, “Ёшлар дафтари”га киритилган ёшлар эса 7 нафарни ташкил этади. 

“Қишлоқда бир кун” лойиҳаси доирасида амалга оширилган оммавий тадбирда дастлаб мазкур маҳалла ҳудудида жойлашган 21-умумтаълим мактаби ҳудудида аҳоли учун тиббий кўрик ташкил этилди. Унда вилоят соғлиқни сақлаш бошқармаси ва туман бўлимининг малакали эндокринолог, ЛОР, ЭКГ, педиатр, уролог-жарроҳ, гинеколог каби тор доирадаги шифокорлар томонидан жами 14 дан зиёд йўналишларда 300 нафарга яқин кексалар, туғиш ёшидаги аёллар, ёшлар саломатлиги текширилди. 

– Юрагимдаги муаммолар, қон босими кўтарилиш ҳолатлари бўйича шифокорларга мурожаат қилдим, – дейди 53 ёшли Санобар опа Тўраева. – Улар саломатлигимни кўздан кечириб, зарур тавсиялар беришди. Узоқ жойда яшаганимиз учун туман марказидаги шифохонага боришга шароитим бўлмасди. Шу туфайли тиббиёт ходимларининг ўзлари қишлоғимизга келганидан унумли фойдаландим. 

[gallery-21475]

Шу билан бирга, айрим фуқароларнинг хонадонига борган ҳолда мутахассислар томонидан тиббий текширувлар ҳам ўтказилди. Жараёнда беморларга керакли тавсиялар берилди ва соғломлаштириш режаси белгиланди. Ҳамширалар томонидан ҳар бир беморнинг аҳволига алоҳида эътибор қаратилди. 

– Ҳозирги вақтда тиббиётни олис жойлардаги аҳолига имкон қадар яқин қилиш бизнинг асосий вазифаларимиздан бири, – дейди Тошкент вилояти соғлиқни сақлаш бошқармаси бошлиғи Тўрақул Арзиқулов. – Сабаби қайси тоифадан бўлишидан қатъий назар улар бу имкониятлардан четда қолмаслиги керак. Шуни эътиборга олиб, биз, аввало, скрининг текширувларга эътибор берамиз. Бу орқали беморларда қанд касаллигининг олдини олиш, турли ёшга доир хасталикларни таҳлил қиламиз. Одатда ҳавоси тоза, тоғли жойларда касалликка чалинишлар кам бўлади. Бироқ махсус рентген ва турли текширув аппаратлар билан жиҳозланган автотранспортларимизда мутахассислар талаб асосида аҳолига хизмат кўрсатмоқда. 

Шунингдек, тадбир доирасида маҳалла ёшлари иштирокида волейбол, стол тенниси, шашка каби қатор спорт турлари бўйича мусобақалар ташкил этилди. Ғолиблар ва фаол иштирокчилар ташкилотчилар томонидан эсдалик совғалари билан тақдирланди. 21-умумтаълим мактаби кутубхонаси учун 500 га яқин бадиий ва илмий-оммабоп китоблар топширилди. Аҳоли, айниқса, ёшларнинг вақтини мазмунли ташкил этиш мақсадида кўчма кинотеатр ташкил этилди. 

– Бундай саъй-ҳаракатлардан кўзланган мақсад ёшларнинг ижтимоий фаоллигини оширишдир, – дейди Ёшлар ишлари агентлиги Тошкент вилояти бошқармаси раҳбари Нодир Ҳожиев. – Кун давомида улар билан яқиндан танишиб, таклиф ва ташаббусларини ўргандик. Энди йил давомида улар билан мунтазам ишлаб, вилоятимизда ташкил этиладиган турли тадбирлар, оммавий спорт мусобақалари, турли ижтимоий лойиҳаларга жалб қиламиз. Бундан ташқари, Тошкент вилояти ҳокими Зойир Мирзаев ва сектор раҳбарлари иштирокида оммавий сайёр қабул ташкил этилди. Шу ерда нуронийлар билан суҳбат қилиб, уларнинг дуолари олинди. 

Ҳозирги ташкил этилаётган сайёр қабулларга келаётган фуқаролар оддий мурожаатлар билан келмаяпти. Улар аниқ мақсад, масъуллар олдига амалга ошириш лозим бўлган ишларни талаб қилмоқда. Кўпчилик қабулга келганлар давлат раҳбари қарор ва фармонлари асосида, деб ҳам мурожаатларини бошлайди. Шундай пайтларда масъул раҳбарларнинг янада ҳушёрлиги ортади.

Тадбир давомида аҳоли учун арзонлаштирилган озиқ-овқат маҳсулотлари савдо ярмаркаси ҳам ташкил этилди. 

А.Мусаев, ЎзА