Сенат ялпи мажлисида “Экологик экспертиза, атроф-муҳитга таъсирни баҳолаш ва стратегик экологик баҳолаш тўғрисида”ги қонун кўриб чиқилди.
– Мамлакатимизда экологик экспертизанинг ҳужжатлари салкам 25 йил олдин қабул қилинган “Экологик экспертиза тўғрисида”ги қонун ва бошқа қонун ости ҳужжатлар асосида амалга оширилмоқда, – деди Сенатнинг Аграр, сув хўжалиги масалалари ва экология қўмитаси раиси Анвар Тўйчиев. – Бу эса, ўз навбатида, амалдаги ҳуқуқий ҳужжатлар тарқоқ, қатор нормалар эса ҳавола хусусиятига эга эканини, соҳани тартибга солишнинг халқаро талабларга мос бўлган ҳуқуқий механизмлари жорий этилмаганини кўрсатмоқда. Қонунчиликдаги ушбу камчиликлар бугунги куннинг муҳим масалаларидан бўлган халқаро инвесторларнинг юртимизга кириб келишига, мамлакат имижига салбий таъсир кўрсатмоқда.
Қўмита раисининг қайд этишича, мазкур қонун лойиҳаси бугунги кун талабларидан келиб чиққан ҳолда тайёрланган бўлиб, унда экологик экспертизанинг атроф-муҳитга таъсирини баҳолаш ва стратегик экологик баҳолашнинг тушунчалари, мақсадлари, асосий принциплари, махсус ваколатли давлат органи ҳамда унинг ваколатлари, экологик экспертизанинг турлари, объектлари, субъектлари, экологик нормативлар лойиҳаларини ишлаб чиқиш ва расмийлаштириш масалалари акс этган.
Шунингдек, атроф-муҳитга таъсирни баҳолашда жамоатчиликнинг иштироки ҳақидаги нормалар ҳам белгиланмоқда. Стратегик лойиҳаларнинг атроф-муҳитга таъсирини баҳолаш тизимини қабул қилинган халқаро нормаларга мослаштириш мақсадида стратегик экологик баҳолаш тизимини жорий этиш назарда тутилмоқда.
Қонун билан Ўзбекистон Республикасининг 4 та қонунига тегишли ўзгартиришлар киритиш, айрим нормалар ўз кучини йўқотган деб топиш назарда тутилмоқда.
Муҳокама давомида сенаторлар амалдаги қонун нормаларини тизимлаштириш, жараёнлар кетма-кетлигини таъминлаш мақсадида ишлаб чиқилган мазкур қонун экологик экспертиза, атроф-муҳитга таъсирни баҳолаш ва стратегик экологик баҳолаш соҳасидаги муносабатларни тартибга солишини таъкидлади.
Муҳокама якунида қонун сенаторлар томонидан маъқулланди.
Умиджон Қурбонов,
Носир Ҳайдаров (сурат),
ЎзА