Yurtimizda olti yildan buyon og‘ir ijtimoiy vaziyatga tushib qolgan, ko‘makka muhtoj xotin-qizlarni qo‘llab-quvvatlash maqsadida mahallalarda “Ayollar daftari” yo‘lga qo‘yildi. Bu mahallalardagi kam ta’minlangan oilalar, nogironligi bo‘lgan shaxslar, hayotning turli sinovlari tufayli qiynalib qolgan yurtdoshlarimizga davlat tomonidan ko‘mak berish, ularning hayotini izga tushirishda muhim rol o‘ynamoqda. Xonadonbay o‘rganish asosida shakllantiriladigan ro‘yxatga kiritilgan xotin-qizlarga davlat mablag‘lari hamda mahalliy hokimliklar hisobidan yordam ko‘rsatiladi, ularning doimiy daromad manbaiga ega bo‘lishi uchun imkoniyat yaratiladi.

“Ayollar daftari”ni  shakllantirish va unda qayd etilgan opa-singillarimizga manzilli yordam berishga oila va xotin-qizlar qo‘mitasi bilan birga O‘zbekiston kasaba uyushmalari federatsiyasi ham mas’ul hisoblanadi.  

– Ayni paytda mahallalarda “Ayollar daftari”ning oltinchi bosqichini amalga oshirish uchun xonadonma-xonadon o‘rganish orqali ro‘yxat shakllantirilmoqda, – deydi O‘zbekiston kasaba uyushmalari federatsiyasining Samarqand viloyati kengashi raisi o‘rinbosari Akbar Abdusaidov. – 2024 yil 10 dekabrda Vazirlar Mahkamasining “O‘zbekiston Respublikasi Oila va xotin-qizlar qo‘mitasi faoliyati hamda “Ayollar daftari” bilan ishlash tizimi takomillashtirilishi munosabati bilan O‘zbekiston Respublikasi Hukumatining ayrim qarorlariga o‘zgartirish va qo‘shimchalar kiritish to‘g‘risida”gi qaroriga ko‘ra, bu jarayonda ayrim o‘zgarishlar bo‘ldi. Ilgari ko‘makka muhtoj xotin-qizlarni ro‘yxatga kiritish uchun bir necha tashkilotlar xodimlaridan tarkib topgan guruh yil boshida xonadonma-xonadon o‘rganish ishlarini olib borgan bo‘lsa, endilikda bu ishni “mahalla yettiligi” tegishli sektor vakillari bilan birgalikda amalga oshirmoqda. Chunki, endilikda yettilik tarkibida aholining turmush darajasini o‘rganish imkoniyatiga ega tegishli sohalar vakillari faoliyat olib bormoqda. Viloyatimizda ro‘yxat shakllantirish ishlari 5 yanvardan boshlandi va 30 yanvarigacha davom etadi. Ushbu jarayon borishini kasaba uyushmalari tashkilotlari xodimlari ham kuzatib, jamoatchilik nazoratini amalga oshirmoqda.  

[gallery-21354]

Anketa so‘rovnoma to‘ldirib bo‘lingach, 30 yanvardan 15 fevralgacha “mahalla yettiligi” tomonidan xotin-qizlarning ijtimoiy himoyaga muhtojlik darajasi, ya’ni toifasi aniqlanib, “Ayollar daftari”ning oltinchi bosqichiga kiritiladigan xotin-qizlar ro‘yxatlari shakllantiriladi. So‘ngra “yettilik” har bir ayolga yordam ko‘rsatish bo‘yicha individual dastur ishlab chiqadi hamda sektor rahbariga taqdim etadi.

15 fevraldan 25 fevralgacha sektor rahbarlari hamda oila va xotin-qizlar bo‘limi boshlig‘i barcha mahallalardan ro‘yxat va individual dasturlarni olib, ijro uchun mas’ul bo‘lgan tuman (shahar) tashkilotlari rahbarlarini yig‘adi va dasturlar bilan tanishtiradi. Tuman (shahar) tashkilotlari rahbarlari individual dasturlar bilan tanishib, tasdiqlaydi. Agar mas’ullarda dasturda belgilangan “amaliy yordam” bo‘yicha e’tiroz bo‘lsa, shu joyning o‘zida to‘g‘rilab, keyin tasdiqlashadi. Individual dasturlar sektorlar va mas’ul tashkilotlar rahbarlari tomonidan imzolanganidan keyin uning asl nusxasi “mahalla yettiligi”ga qaytarib beriladi.

“Mahalla yettiligi” “Ayollar daftari”ga kiritilgan xotin-qizlarga qaysi tashkilot qachon, qancha miqdorda yordam berishini  tushuntirib,  rozi bo‘lsalargina individual dasturlarning asl nusxasiga imzo qo‘ydiradi. Agar ro‘yxatga olingan ehtiyojmand ayolda individual dasturda belgilangan “amaliy yordam”ga nisbatan asoslangan e’tiroz bo‘lsa, individual dastur qayta ishlanadi. Individual dasturlar sektorlar rahbarlari, ijro uchun mas’ul tashkilotlar rahbarlari va ehtiyojmand ayollar tomonidan imzolanganidan keyingina “mahalla yettiligi”ning kollegial qarori bilan tasdiqlanadi.

– Individual dasturlar “mahalla yettiligi” tomonidan yuritiladi va mahalla idoralarida saqlanadi – deya so‘zida davom etadi A.Abdusaidov. –Sektor rahbarlari hamda oila va xotin-qizlar bo‘limi boshlig‘i individual dasturlar asosida “Yo‘l xaritasi”ni ishlab chiqadi va tasdiqlaydi. Sektorlar rahbarlari, tuman (shahar) oila va xotin-qizlar bo‘limlari boshliqlari hamda “Mahalla yettiligi” a’zolari “Ayollar daftari”ga kiritiladigan xotin-qizlar ro‘yxatini shakllantirishda ma’lumotlarning haqqoniyligi bo‘yicha shaxsan javobgar hisoblanadi. Bu masala “Ayollar daftari” nizomida qat’iy belgilab qo‘yilgan. Barcha hujjatlar tasdiqlanganidan keyin mart oyidan boshlab noyabr oyigacha ehtiyojmand ayollarga ularning individual dasturlari asosida tegishli tashkilotlar tomonidan amaliy yordam ko‘rsatiladi. Amaliy yordam berishda, jumladan, mablag‘larni sarflash bilan bog‘liq masalalarda “mahalla yettiligi” tavsiyasi, xulosasi yoki qarori kerak bo‘ladi.

Bu davrda, ya’ni mart-noyabr oylari davomida sektorlar rahbarlari har oy yakunida amalga oshirilgan ishlarni tegishli tashkilotlar rahbarlari va “mahalla yettiligi” bilan birgalikda tahlil qilib boradi, muammolar vujudga kelsa, ularni bartaraf etish choralarini ko‘radi.

Bundan tashqari, sektorlar rahbarlari, oila va xotin-qizlar bo‘limlari boshliqlari va mas’ul tashkilotlar rahbarlari individual dasturlarda belgilangan chora-tadbirlar ijrosi va uning haqqoniyligi bo‘yicha har chorak yakunida tegishli Xalq deputatlari tuman (shahar) Kengashlariga axborot beradi.

G‘.Hasanov, A.Isroilov (surat),

O‘zA muxbirlari