Ассалому алайкум. Ўзбекистон Миллий ахборот агентлиги виртуал мухбири сизларни ўтган ҳафтада содир бўлган муҳим воқеа ва ҳодисалар тафсилотлари билан таништиради.

Ўн тўртинчи январь Ватан ҳимоячилари куни ҳамда Ўзбекистон Республикаси Қуролли кучлари ташкил этилганлиги ўттиз уч йиллиги юртимиз бўйлаб кенг нишонланди. Шавкат Мирзиёев Ўзбекистон Республикаси Қуролли Кучлари ташкил этилганининг ўттиз уч йиллиги ҳамда Ватан ҳимоячилари куни муносабати билан ҳарбий хизматчилар ва ҳуқуқни муҳофаза қилиш органлари ходимларидан бир гуруҳини мукофотлади.

***

Ўзбекистон Республикаси Президенти Шавкат Мирзиёев Бирлашган Араб Амирликлари Президенти Шайх Муҳаммад бин Зоид Ол Наҳаённинг таклифига биноан ўн учинчи январдан ўн олтинчи январгача расмий ташриф билан ушбу мамлакатда бўлди. Ўзбекистон ва БАА президентлари ўртасида бўлиб ўтган музокаралар якунида қуйидаги ҳужжатлар имзоланди:  

Стратегик шериклик ўрнатиш тўғрисида декларация;  

Инвестицияларни ўзаро рағбатлантириш ва ҳимоя қилиш тўғрисида ҳукуматлараро битим;  

Молиявий-техник ҳамкорлик тўғрисида ҳукуматлараро битим;

Стандартлаштириш, метрология ва мувофиқликни баҳолаш соҳасидаги ҳамкорлик тўғрисида битим;

Инвестициялар, саноат ва илғор технологиялар, адлия, қишлоқ хўжалиги ва озиқ-овқат хавфсизлиги, фойдали қазилмалар соҳаларида ҳамкорлик қилиш тўғрисида идоралараро битимлар;

Маданият соҳасидаги ҳамкорлик тўғрисида баённома, Дипломатик академиялар ўртасидаги ҳамкорлик тўғрисида битим ва бошқалар.

***

Тошкент шаҳридаги Президент мактаби барқарор ривожланиш бўйича Шайх Зоид Ол Наҳаён номидаги нуфузли мукофотнинг «Глобал ўрта мактаблар» номинациясида ғолиб деб топилди.  

Мукофотни Бирлашган Араб Амирликлари Президенти Шайх Муҳаммад бин Зоид Ол Наҳаён топширди. Тақдирлаш маросимида Шавкат Мирзиёев иштирок этди ва жамоани табриклади.

Тошкент Президент мактаби ўқувчилари Европа ва Марказий Осиё давлатларидан келган иштирокчилар ичида фахрли биринчи ўринни ҳамда бир юз эллик минг АҚШ доллари миқдоридаги грантни қўлга киритди.

***

Сирдарё вилояти ҳокими Акмалжон Маҳмудалиев лавозимидан озод қилинди. Бу ҳақда Шавкат Мирзиёев раислигида ўтган йиғилишда маълум қилинди. Бунга сабаб сифатида ҳудудда инвестицияларни жалб қилиш, қишлоқ хўжалигини ривожлантириш ва бошқа йўналишлардаги фаолиятда жиддий камчиликларга йўл қўйгани таъкидланган.

***

Ўзбекистон ялпи ички маҳсулоти икки минг йигирма тўртинчи йилда олти бутун ўнда беш фоизга ошиб, бир юз ўн беш миллиард долларга етди. Бу ҳақда президент Шавкат Мирзиёев маълум қилди.

Хорижий инвестиция бир бутун ўнда олти баробар ўсиб, ўттиз тўрт миллиард тўққиз юз миллион долларни ташкил қилди, қиймати ўн миллиард долларлик икки юз қирқ иккита йирик ва ўрта лойиҳалар ишга тушди, экспорт илк бор йигирма етти миллиард долларга чиқди.

Ўтган йили элликта туманга юз миллион доллардан кўп сармоя кириб келди (икки минг йигирма учинчи йилда бундай туманлар ўн битта эди).

***

Тошкент педиатрия тиббиёт институтида аёл тўрт нафар чақалоқни дунёга келтирди. Болалар икки ўғил ва икки қиз бўлиб, уларга Муҳаммад, Мустафо, Сумая ва Сафия исмлари қўйилган. Ҳозирда улар соғлом.

Асли сурхондарёлик ёш оиланинг эгизаклардан ташқари икки ёшли қиз фарзанди ҳам бор.

***

Бугунга етказмоқчи бўлган хабарларимиз шулардан иборат. Ўзбекистон Миллий ахборот агентлигини кузатишда давом этинг.

<iframe width="560" height="315" src="https://www.youtube.com/embed/Qq32IS5KJS0?si=VEc3LOPkCinQvAX_" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>