Маълумки, жорий йил 13-15 январь кунлари Ўзбекистон Республикаси Президенти Шавкат Мирзиёев Бирлашган Араб Амирликлари Президенти Шайх Муҳаммад бин Зоид Ол Наҳаённинг таклифига биноан расмий ташриф билан ушбу давлатда бўлди.

Шу тариқа давлатимиз раҳбари томонидан дунёнинг етакчи давлатлари ва минтақаларига амалга оширилаётган қатор тарихий ташрифлар мажмуаси яна бир муҳим сиёсий воқеа билан тўлди, дейиш мумкин. Қолаверса, энди биз учун аҳамиятли бўлган Форс кўрфазининг асосий давлати билан юқори даражадаги мулоқот имконияти янада кенгайди. Кўзда тутилган режа ва мақсадлар алоқаларни сезиларли даражада кучайтириш истагини ифодалайди.

ЎзА мухбири мазкур ташриф якунлари ва БАА билан стратегик ҳамкорлик истиқболлари хусусида ТДШУ Таҳлилий тадқиқотлар маркази директори Сайфиддин Жўраевнинг фикрлари билан қизиқди.

– Давлатимиз раҳбарининг Бирлашган Араб Амирликларига расмий ташрифи давомида фаол ривожланиб бораётган икки ва кўп томонлама сиёсий дипломатик муносабатларни янада мустаҳкамлаш, савдо, иқтисодиёт, инвестиция, “яшил” энергетика, қишлоқ хўжалиги, инфратузилма, рақамлаштириш, инновацион ривожланиш, туризм ва  маданий-гуманитар сохалардаги амалий хамкорликка оид устувор йўналишлар қамраб олинди. 

Аввало, айтиш жоиз, кейинги йилларда Ўзбекистон ташқи сиёсатида араб давлатлари билан ўзаро манфаатли ҳамкорлик янги босқичга чиқмоқда. БАА Ўзбекистоннинг минтақадаги асосий шерикларидан бири. Мамлакатларимиз ўртасида парламентлараро, ташқи сиёсий идоралар ҳамда ҳукуматлар, вазирлик ва идоралари ўртасида йўлга қўйилган яқин, конструктив мулоқот изчил фаоллашмоқда. Бу галги расмий ташриф чоғида Ўзбекистон Президенти “Абу-Даби барқарор ривожланиш ҳафталиги” халқаро саммитининг очилиши ва барқарор ривожланиш соҳасида Шайх Зоид номидаги мукофотни топшириш маросимида иштирок этди ва нутқ сўзлади.

Шавкат Мирзиёевнинг Абу-Даби шаҳридаги “Қаср аш-Шати” қароргоҳида Президент Шайх Муҳаммад Ол Наҳаён, шунингдек Вице-президент Шайх Мансур Ол Наҳаён, сунъий интеллект вазири Умар бин Султон ал-Олама, инвестициялар вазири, “ADQ” холдинги бош ижрочи директори Муҳаммад Ҳасан Ал-Сувайдий, энергетика ва инфратузилма вазири Суҳайл Муҳаммад Ал-Мазруий, Дубай шаҳрида Вице-президент, Бош вазир Шайх Муҳаммад бин Рошид Ол Мактум ва кўплаб компаниялар раҳбарлари билан олиб борган музокаралари натижалари Ўзбекистон – Амирликлар муносабатларида янги давр бошланганидан далолат беради.

Ўз стратегик мақсадларига эга БАА ва Ўзбекистон бир-бирига ишончли дўст ва вақт синовидан ўтган ҳамкор сифатида қарамоқда. Охирги йиллари икки ўлка муносабатлари шиддат билан ривожланиб бораётгани, бу алоқалар халқларимиз учун бирдек манфаатли эканини исботлайди.

Таъкидлаш керак, мамлакатларимиз манфаатлари кўп жиҳатдан бир-бирига мос келадиган узоқ муддатли шериклардир. Ҳар икки давлат бир-бирини тўлдирадиган миллий ривожланиш стратегиясини амалга оширмоқда.

Ўзбекистон Президенти раҳбарлигида ислоҳотларнинг янги босқичига ўтилди. Иқтисодиётни модернизация қилиш, рақобатбардошликни кучайтириш, хорижий инвестиция жалб қилиш ва аҳоли фаровонлигини изчил ошириб боришни ўз ичига олган 2022-2030 йилларга мўлжалланган Янги Ўзбекистон тараққиёт стратегияси қабул қилинди. Ўз навбатида, БАА ҳам иқтисодий алоқани диверсификация қилиш, қўшимча инвестиция жалб қилиш, янги бозорларни ўзлаштириш, мамлакатнинг илмий-технологик, ишлаб чиқариш ва экспорт салоҳиятини юксалтиришга қаратилган узоқ муддатли тараққиёт дастурини амалга оширишга киришган.

Икки томонлама муносабатлар, жумладан, олий даражадаги мунтазам мулоқот изчиллик касб этган. Буларнинг бари халқаро муносабатлар тартибот тизими ўзгариши, жаҳондаги, айниқса Яқин Шарқдаги вазият мураккаблашган шароитда амалга оширилмоқда. Гап шундаки, Ўзбекистон ва БАА муаммоли вазиятларни ҳал этиш бўйича бир-бирига ўхшаш позицияга эга бўлиб, ўзига хос ташаббуслар билан чиқмоқда. Мамлакатларимиз ўртасида ўзаро товар айирбошлаш ҳажми, қўшма корхоналар ва авиақатновлар сони ошмоқда. Бирлашган Араб Амирликлари етакчи компаниялари иштирокида Ўзбекистонда амалга оширилаётган ва истиқболли лойиҳалар портфели 20 миллиард АҚШ долларига етди.

Хулоса қилиб айтганда, мазкур расмий ташриф сиёсий, иқтисодий ва маданий алоқаларни кучайтириш ва янги босқичга олиб чиқишга хизмат қилади. Савдо, инвестиция, хавфсизлик ва таълим соҳаларида шерикликни кучайтириш учун янги имкониятлар очади.

Ўткир Алимов, ЎзА