Россия ва Украина ўзлари белгилаб олган мақсад томон ҳаракатланишда, ташқи кучлар эса умумий манфаатли йўлларни излашда давом этмоқда.

Хусусан, Президент Владимир Зеленский ўзаро уруш жорий йилдан кечикмай якунланиши кераклигини айтиб, мамлакатининг НАТОга аъзо бўлиш истагини яна бир бор билдирди. Бу ҳақда “Euronews” ёзди.

– Жанг майдонидаги вазият зарур танловни амалга ошириш имконини яратади, – деди Зеленский Жануби-шарқий Европа давлатлари раҳбарлари иштирокида ўтказилган саммитда. – Урушни 2025 йилдан қолдирмай тугатиш учун қатъий ҳаракат қилиш зарур. Биз Президент Байден маъмуриятига, Буюк Британия, Франция, Германия ва Италиянинг Европада хавфсизлик ва тинчлик ўрнатиш йўлидаги дадил саъй-ҳаракатларига ишонамиз. НАТОга қўшилишимиз эса дунё тинчлиги йўлида ҳақиқий қадам бўлади.

Ташриф чоғида Украина раҳбари Хорватия билан кейинги ҳамкорлик тўғрисида, хусусан Болқондаги ушбу давлатнинг 1991-95 йиллардаги урушдан кейинги гуманитар ёрдам билан боғлиқ фаолияти, минадан тозалаш ва уруш жиноятини таъқиб қилиш тажрибасини ўзлаштириш бўйича шартнома имзолади.
Учрашувда Албания, Босния ва Герцеговина, Болгария, Греция, Косово, Молдова, Черногория, Шимолий Македония, Руминия, Сербия, Словения ва Туркия вакиллари ҳам иштирок этди. Қатнашчилар тажовузкорликни қораловчи, Зеленскийнинг тинчликка эришиш борасидаги саъй-ҳаракати, Украинанинг Шимолий Атлантика альянсига кириши ва урушдан кейин тикланишини қўллаб-қувватловчи қўшма декларация қабул қилди.

– Эркин, тинч ва фаровон Украинасиз шундай Европа бўлиши мумкин эмас, – дейилган ҳужжатда.

Айни пайт Россия Ташқи ишлар вазирлиги вакили Мария Захарова, агар мамлакат НАТОга қўшилса, “Украинада тинчликка эришиб бўлмайди”, деди.
Унинг таъкидлашича, ғарб Украинадан “қарама-қаршилик учун трамплин” сифатида фойдаланмоқда.

Мусулмон Зиё, ЎзА