Қори Ниёзий номидаги Тарбия педагогикаси миллий институтининг хорижий мамлакатлар илмий тадқиқот институтлари олимлари ва мутахассислари билан ўзаро алоқалар кўлами тобора кенгайиб бормоқда. Яқинда институтда Фарғона вилояти ҳокимининг Таълим бўйича маслаҳатчиси, япониялик тажрибали педагог Гото Микаконинг институт олимлари ва докторантлари билан учрашуви ташкил этилди.

– Таълим-тарбия ҳар бир даврда энг муҳим ҳаётий масала ҳисобланган, – деди Қори Ниёзий номидаги Тарбия педагогикаси миллий институти директори, педагогика фанлари доктори, академик Холбой Ибраимов. – Зеро, бугунги авлоднинг таълим-тарбияси эртанги тараққиётимизга пойдевор бўлади. Институтимизнинг бир гуруҳ вакиллари Японияда бўлиб, у ердаги таълим, хусусан, тарбия соҳасида олиб борилаётган ишлар, бу борада тўпланган тажрибалар билан бевосита танишиб қайтган эди. Бугунги учрашувни ана шу сафар ва алоқаларимизнинг мантиқий давоми, деб аташ мумкин.

Учрашувда Гото Микако Япония таълим тизими тажрибаси, таълимда оила ва тарбиянинг ўрни хусусида кенг маълумотлар берди:

– Биз ҳам жуғрофий, ҳам менталитет жиҳатидан шарқлик саналамиз. Шу боис бизнинг муштарак ва уйғун жиҳатларимиз жуда кўп. Бу, ўз навбатида, Япония билан Ўзбекистон таълим-тарбия соҳасида яқин ҳамкорлик ўрнатишда мустаҳкам замин бўла олади. Тарбия бундан уч йил аввал Япония мактабларида қўшимча фан сифатида ўргатилган бўлса, эндиликда асосий фанлар қаторига киритилди. Мени хурсанд қилган жиҳат шундаки, бугунги кунда Ўзбекистонда ҳам тарбия асосий фанлар қаторида ўқитилмоқда. Айниқса, жорий йилда Президент қарори билан Қори Ниёзий номидаги Тарбия педагогикаси миллий институти ташкил этилгани мени ниҳоятда қувонтирди. Бугунги кунда жуда кўп мамлакатларда тарбияга алоҳида эътибор қаратилаётгани бежиз эмас. Чунки дунё миқёсидаги интеграция ва глобаллашув жараёнлари, ахборот коммуникация воситаларининг кенг ривожланиши, айниқса, ахборот тарқалиши ва алмашинувининг тезкорлиги, чегара билмаслиги ёшларимизда ахлоқ ва тарбияга бўлган эҳтиёж ҳамда эътиборни янада оширди. Ёшларни турли таъсир ва таҳдидлардан асраш, миллий анъана ва қадриятларни сақлаш ҳамда тиклашда бу жуда ҳам муҳим восита саналади, – деди меҳмон.

Гото Микако институт жамоасига Япониядаги Чибо университети олимлари томонидан тайёрланган таълим ва оилада тарбия методикасига доир дарслик ҳамда қўлланмаларни тақдим этди.

Фарғона вилояти ҳокимининг Таълим бўйича маслаҳатчиси, тажрибали педагог Гото Микако пойтахтимиздаги бир қанча давлат ва хусусий мактаб ҳамда мактабгача таълим ташкилотларида бўлиб, у ердаги таълим-тарбия тизими ҳамда методикалари билан яқиндан танишди.

М.Комилова, ЎзА