“Миср бугун” нашри 22 декабрь, якшанба куни Тошкент шаҳрида вазирлар қўмитасини чақиришга тайёргарлик кўриш мақсадида Ўзбекистон – Миср иқтисодий, илмий ва техник ҳамкорлик бўйича қўшма қўмитаси еттинчи мажлиси доирасидаги экспертлар йиғилиши бошланганини ёзди. Қайд этилишича, 15 йилдан кейин биринчи марта ўтказилаётган мазкур тадбир мамлакатимиз инвестициялар, саноат ва савдо вазири Лазиз Қудратов ҳамда Мисрнинг режалаштириш, иқтисодий ривожланиш ва халқаро ҳамкорлик вазири Рания Машат раҳбарлигида ўтказилади.

Анжуман дастурига икки давлат йирик тадбиркорлари иштирокидаги бизнес-форум ҳам киритилган.

Ҳафта давомида бўлиб ўтадиган тадбирларда иштирок этиш учун юртимизга ушбу давлатнинг 30 дан зиёд йирик компанияси раҳбарлари етиб келган.

– Ушбу сессия икки давлат раҳбариятининг ўзаро муносабатларни мустаҳкамлашга интилишини ифодалайди, – деб ёзган нашр. – Айниқса Президент Абдулфаттоҳ Ас-Сиси 2018 йил сентябрда Ўзбекистонга ташриф буюргандан кейин Мисрнинг Марказий Осиё минтақасига қизиқиши ортди.

Шунингдек, мақолада давлатимиз раҳбари Шавкат Мирзиёев Президент Абдулфаттоҳ Ас-Сиси таклифига биноан 2023 йил 20-21 февраль кунлари Мисрга ташриф буюргани, давлат раҳбарларининг сиёсий иродаси ва биргаликдаги саъй-ҳаракати туфайли сўнгги йилларда кўп қиррали ҳамкорлик янги босқичга кўтарилгани таъкидланган.

Қўшма комиссия йиғилиши якунида вазирлик, идоралар ўртасида шартномалар, компаниялар иштирокида инвестиция ва экспорт битимлари имзоланиши кутиляпти.

Муҳаррама Пирматова, ЎзА