Олий Мажлис Қонунчилик палатасининг Аграр ва сув хўжалиги масалалари қўмитаси томонидан “Сув кодекси лойиҳасининг мазмун-моҳияти ва долзарблиги” мавзусида семинар ўтказилди. Унда Қонунчилик палатасида иккинчи ўқишга тайёрланаётган Сув кодекси лойиҳасида акс этаётган муҳим нормалар кўриб чиқилди.

Таъкидланганидек, Сув кодекси лойиҳасида бир қатор муҳим нормалар ўз аксини топмоқда. Жумладан, сув хавфсизлигига эришиш, глобал сув тақчиллиги кучайиб бораётган даврда барча иқтисодиёт тармоқларининг ва атроф-муҳитнинг сувга бўлган эҳтиёжини қондириш, сув ресурсларидан оқилона фойдаланиш, сув инфратузилмасининг ва суғориладиган ерларнинг ҳолатини яхшилаш каби масалалар қамраб олинган.

Лойиҳани иккинчи ўқишга тайёрлаш давомида соҳадаги муносабатларни изчил ва тизимли ҳал этиш, сувдан фойдаланишда фуқаролар масъуллигини белгилаш, сувдан оқилона фойдаланишда зарур шарт-шароитлар яратиш, сув етказиб берувчилар ва сув истеъмолчиларининг ўртасидаги муносабатларда шаффофликни таъминлашга алоҳида эътибор қаратилмоқда.

Шунингдек, кодекс лойиҳасида аҳоли, иқтисодиёт тармоқлари ва экотизимни сув билан барқарор таъминлаш, сувни ифлосланиш, булғаланиш ва камайиб кетишидан муҳофаза қилишда замонавий усулларни қўллаш ва сувнинг зарарли таъсири олдини олиш ва уни бартараф этиш чораларини кўришга қаратилган нормалар ўз аксини топмоқда.

Муҳокамаларда депутатлар сув ресурсларини иқлим ўзгаришини инобатга олган ҳолда оқилона бошқариш ва уларнинг ҳисоботини юритиш, сув объектлари муҳофаза зоналарини белгилаш, тоза ичимлик сув таъминотини йўлга қўйиш масалалари ҳам кодексда ўз аксини топиши лозимлигини билдирди.

М.Комилова, ЎзА