Миллий матбуот марказида “Туронбанк” АТБ томонидан жисмоний шахсларга тақдим этилаётган хизматлар юзасидан матбуот анжумани ташкил этилди.
Матбуот анжуманида қайд этилишича, Ўзбекистон молия бозорида 34 йилдан буён самарали меҳнат қилиб келаётган “Туронбанк” акциядорлик тижорат банки бугунги кунда Республика бўйича ўзининг 20 та банк хизматлари маркази ва 60 дан зиёд офислари орқали юридик ва жисмоний шахсларга сифатли хизмат кўрсатиб келмоқда. Жорий йилда тижорат банки фуқароларнинг молиявий эҳтиёжларини қондириш ва янги маҳсулотларни амалиётга татбиқ этиш бўйича самарали ишларни олиб борди.
—Жорий йилнинг 1 ноябрь ҳолатига банкнинг жами капитали 1 триллион 917 миллиард сўмни ташкил этди, — дейди “Туронбанк” АТБ Чакана бизнес департаменти директор ўринбосари Саидамир Умаров. — Айни шу даврда активлар 17 триллион 2 миллиард сўмга етиб, 6,7 фоизга ошди. Шунингдек, 2024 йил бошидан юридик ва жисмоний шахслардан жалб қилинган депозитлар миқдори 5 триллион 097 миллиард сўмга етди. Бу ўтган йилнинг шу даври билан солиштирганда 9,4 фоиз кўп демакдир. Жами кредит қўшилмалари эса 12 триллион 405 миллиард сўмни ташкил этди. Бу кўрсаткич йил бошига нисбатан 4,3 фоизга ўсди.
Матбуот анжумани давомида Туронбанк томонидан жисмоний шахсларга тақдим этилаётган хизматлар ҳақида маълумот берилди. Жумладан, 2024 йил бошидан “Туронбанк” АТБ томонидан жисмоний шахсларга умумий ҳисобда 476,6 млрд. сўм миқдоридаги кредитлар ажратилган. Уларнинг 130 млрд. сўми 543 нафар мижозга ипотека кредитига, 142,6 млрд. сўми 8 минг 515 нафар мижозга ўзини-ўзи банд қилган аҳолига микрокредит асосида, 66,5 млрд. сўми 2 минг 780 нафар фуқарога микроқарз, 70,3 млрд. сўми 510 нафар мижозга автокредит, 21,5 млрд. сўми 2 минг 141 нафар талабага таълим кредити учун ва 44,2 млрд. сўми 5 минг 658 нафар мижозга онлайн микроқарзга расмийлаштирилган.
Бундан ташқари, 1 ноябрь ҳолатига “Туронбанк” АТБ томонидан жисмоний шахслар омонат қолдиғи 1 триллион 577 миллиард сўм бўлиб, бу ўтган йилнинг шу даврига нисбатан 26 фоизга ўсди. Бунинг натижасида мижозларга қулай ва манфаатли бўлган миллий валютада “Premium”, “Kelajak Poydevori”, “Ustuvor”, “Imkoniyat plus”, “Maksimum onlayn”, “Optimum” ҳамда хорижий валютада омонатлари тақдим этилди.
Қолаверса, нақд пулсиз ҳисоб-китобларни кенгайтириш ва пластик карточкалар эмиссиясини кўпайтириш бўйича 2024 йилда 627 минг 871 дона миллий валютадаги пластик карточкалар муомалага чиқарилган бўлиб, шундан 394 минг 544 донаси “UzCard” ва 223 минг 327 таси “Humo” тизимидаги пластик карточкалар ҳисобланади. Шу билан бирга, 2 минг 192 та “Visa” ҳамда 731 та “MasterCard” халқаро пластик карточкалар ҳам фуқароларга очиб берилди. Мазкур пластик карточкалардаги пулларни нақдлаштириш, кирим қилиш ва бошқа амалиётлар учун бутун республика бўйича 143 та “UzCard”, 133 та “Humo” ва 62 дона валюта айирбошлаш хусусиятига эга банкоматлар ишлаб турибди.
Яна бир жиҳатни қўшимча қилиш лозим. “Туронбанк” акциядорлик тижорат банки Халқаро молия корпорацияси билан ҳамкорликда 2022 йилда банкнинг янги “MyTuron” мобил иловаси янгиланган талқинини ишлаб чиқди. Янги дизайн, замонавий интерфейс ва кўплаб банк хизматларини ўзида жамлаган иловани жорий йилнинг 1 ноябрь ҳолатига 400 мингдан ортиқ фойдаланувчи юклаб олди ва идентификациядан муваффақиятли ўтди. “MyTuron” мобил иловасида бир неча дақиқа ичида онлайн микроқарз олиш, “UzCard”, “Humo”, “Visa” ва “MasterCard” пластик карталарига буюртма бериш, “Humo Virtual” картасини бепул очиш, турли тўловларни амалга ошириш сингари кўплаб функциялар мавжуд.
— Туронбанк аҳолининг уй-жойга бўлган эҳтиёжидан келиб чиқиб, қулай шартлардаги ипотека кредитларини ҳам тақдим этади, — дейди “Туронбанк” АТБ Чакана бизнес департаменти директор ўринбосари Саидамир Умаров. — Бирламчи ва иккиламчи бозордан хонадон харид қилиш истагида бўлган мижозлар учун 10 йилдан 20 йилгача бўлган муддатга, йиллик 17,5 фоиздан бошлаб ҳеч қандай расмий даромадсиз 420 миллион сўмгача ипотека кредити ажратилмоқда. Албатта, шартлар сиз танлаган уй ва унинг бошланғич тўловига қараб ўзгариши мумкин.
Шаҳноза Маматуропова, ЎзА