Орфан касалликлари кам учрайдиган касалликлар бўлиб, ушбу касалликка чалинган беморларни аниқлаш ҳам, ташхис қўйиш ҳам қийин кечади. Уларни даволаш шифокорлардан махсус билим ва ёндашувларни талаб қилади.

Тошкентда орфан касалликларини ташхислаш ва даволаш бўйича ташкил этилган “Чегарасиз ҳамдўстлик” форуми ушбу муаммоларни ҳал қилиш ва орфан касалликлари ҳақида хабардорликни ошириш учун мутахассисларнинг саъй-ҳаракатларини бирлаштиришга қаратилди.  

—Тадбирнинг мақсади профессионал тиббиёт жамоалари, экспертлар билан тажриба алмашиш учун ягона халқаро майдончани ташкил этишдан иборат, — дейди  Иммунология ва инсон геномикаси институти илмий котиби, тиббиёт фанлари бўйича фалсафа доктори Нодир Рўзимуродов.   

Ўзбекистон Республикаси Фанлар академияси, Ўзбекистон Республикаси Соғлиқни сақлаш вазирлиги, Фанлар академияси Иммунология ва инсон геномикаси  институти, Республика ихтисослаштирилган она ва бола саломатлиги илмий-амалий тиббиёт маркази ҳамкорлигида ўтказилган мазкур форумда 20 га яқин давлатнинг фундаментал ва амалий тиббиёт фанлари, фармацевтика, соғлиқни сақлаш соҳаси мутахассислари, шунингдек қонун чиқарувчи ва ижро этувчи ҳокимият органлари, профессионал тиббиёт жамоалари вакиллари иштирок этди.   

Иштирокчилар орфан касалликларини тадқиқ қилиш, диагностика қилиш ва даволаш бўйича сўнгги ютуқларни муҳокама қилди. 

<iframe width="640" height="420" src="https://www.youtube.com/embed/uAKN6Kl62Io" title="Orfan kasalliklarini tashxislash va davolash masalalari muhokama qilindi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Форум турли мамлакатлар мутахассислари ўртасида алоқа ўрнатиш ва тажриба алмашиш учун платформа яратди. Бу эса ҳамкорликдаги лойиҳалар ва тадқиқотларга ҳисса қўшади. Шунингдек, форум доирасида беморларнинг ҳуқуқлари, дори-дармонларнинг мавжудлиги ва қонунчиликни ўзгартириш зарурати билан боғлиқ муҳим масалалар ҳам кўриб чиқилди.   

Нигора Раҳмонова,

Дониёр Ёқубов, Улуғбек Тўхтаев (видео), ЎзА