Тошкент шаҳар ҳокимлигида Хитойнинг Циндао шаҳридан келган делегация вакиллари билан учрашув бўлиб ўтди.

Учрашувда меҳмонларга Тошкент шаҳар ҳокимининг ўринбосари Шароф Раҳмонов томонидан шаҳримизда  маҳаллий ва хорижий инвесторлар учун яратилган кенг имкониятлар, пойтахтнинг демографик кўрсаткичлари, маиший техника ишлаб чиқариш соҳаси  ҳақида маълумот берилди. Шаҳарсозлик ҳамда саноат йўналишларида  ҳамкорликни жадаллаштириш масалалари муҳокама қилинди.

Хитой халқ сиёсий маслаҳатлашув кенгаши Циндао шаҳри қўмитаси раиси Мен Синбин қабул учун миннатдорлик билдириб, хитойлик тадбиркорларнинг Тошкент шаҳри билан ҳамкорликка қизиқиши катталигини маълум қилди.

Тошкент  ва Циндао ўртасида нафақат савдо-иқтисодий ва инвестициявий муносабатларни, балки  иқтисодиётнинг бошқа истиқболли  соҳаларида ҳамкорликни янада ривожлантириш ҳар икки ҳудуд манфаатларига хизмат қилиши таъкидланди.

Учрашувда, "Hiking Group" , "Hisense Group" , "Qingdao Qianyun High-Tech New Material Co., Ltd." , "Qingdao Qingyang Taiyin Energy Technology Co., LTD" ҳамда "Qingdao Istarwafer Technology Co., Ltd."  компанияси вакиллари билан ҳам суҳбатлашилди ва ўзаро ҳамкорлик таклифлари муҳокама қилинди. Шундан сўнг меҳмонлар "Янги авлод"  саноат зонаси фаолияти билан танишди.

Учрашув якунида тарафлар ўзаро фойдали манфаатлар йўлида ҳаракатларни давом эттиришга келишиб олди.

Гулноза Бобоева, ЎзА