Шу йил 27 октябрь куни мамлакатимизда бўлиб ўтган сайлов, айниқса, аралаш сайлов тизими асосида ташкил этилган парламент сайлови сиёсий партиялар ўртасидаги рақобатни янада кучайтирди.

Пропорционал сайлов тизими, яъни сиёсий партияларга берилган овозлардан келиб чиқиб, Қонунчилик палатасининг 75 та депутатлик ўринларидан Тадбиркорлар ва ишбилармонлар ҳаракати – Ўзбекистон Либерал-демократик партияси – 26 та депутатлик ўрнини, Ўзбекистон “Миллий тикланиш” демократик партияси – 14 та депутатлик ўрнини, Ўзбекистон Халқ демократик партияси – 13 та депутатлик ўрнини, Ўзбекистон “Адолат” социал-демократик партияси – 12 та депутатлик ўрнини, Ўзбекистон Экологик партияси – 10 та депутатлик ўрнини эгаллади. 

Бугун “Дебат Холл” медиа марказида “Сайлов-2024: натижалар таҳлили, янги парламент шаклланиши” мавзусида махсус сессия ташкил қилинди. Унда бешта сиёсий партиянинг вакиллари иштирок этиб, депутатлик сайловларининг якунларини қизғин муҳокама қилди.  

Беш қисмдан иборат шаклда ўтказилган сессияларда сайловда сиёсий партияларнинг фаол ва кучли рақобат асосидаги иштироки, сайловолди тарғибот тадбирлари ва якуний натижалари хусусида тўхталиб ўтилди. Сиёсий партиялар вакиллари эришилган натижалар ва партиянинг келгусидаги фаолияти ҳақида тўхталар экан, ўз позицияларида собит қолган ҳолда бундан кейинги фаолиятларини янада кучайтиришларини қайд этдилар.  

М.Комилова,

ЎзА