Баъзида қайсидир спортчининг допинг дори воситалари сабабли спортдан четлаштирилгани ҳақидаги хабарларни ўқиб қоламиз. Спортчи фарзандларини мана шундай ҳолатлардан асраш учун ота-оналар нималарга эътибор беришлари керак? Допинг маҳсулотлар ҳақидаги тўлиқ маълумотларни қаердан билиш мумкин?

ЎзА мухбирининг шу каби саволларига Ўзбекистон Республикаси Миллий антидопинг агентлиги Халқаро алоқалар ва рейтинглар бўйича бўлим бошлиғи Муҳиддин Ҳошимов жавоб берди:

– Спортчиларни икки турга бўлиш мумкин. Биринчиси, ютуқларга эришиш учун билиб туриб допинг қабул қилувчилар. Иккинчиси, билмасдан, яъни тасодифан допинг маҳсулотларини қабул қилганлар. Иккинчи гуруҳдаги спортчиларнинг шифокорлари, мураббийларида допинг ҳақида етарли маълумотлар бўлмагани туфайли билмасдан тақиқланган маҳсулотларни қабул қилишлари мумкин.

Бундан ташқари спортчилар бирор касалликка учраган бўлса, муолажа учун допингги бор дори воситаларини қабул қилишга мажбур бўлади. Бундай ҳолатда улар қандай йўл тутишлари керак? Бу шароитда улар албатта, терапевтик истисно сўрашлари шарт. Спортчи ўзи яшаётган давлатда миллий антидопинг агентлиги томонидан белгиланган ҳужжатларни терапевтик комиссияга топшириши керак. Ҳар бир агентлик қошида терапевтик истиснолар бўйича комиссиялар бор. Бизнинг агентликда ҳам бу комиссия мавжуд.

Спортчи ушбу комиссиядан тақиқланган дори воситасини мажбуран, яъни даволаниш учун истеъмол қилишга рухсат сўрайди. Комиссия кўриб чиқиб, ҳақиқатан спортчи бу дорини истеъмол қилмаса, соғлиғи янада ёмонлашишини аниқласа, бунга рухсат берилади. Бу шароитда спортчи спортдан четлаштирилмайди, яъни дисквалификация жазоси қўлланилмайди.

Суҳбатнинг тўлиқ қисмини ЎзАнинг You Tube саҳифасида кўришингиз мумкин.

<iframe width="853" height="480" src="https://www.youtube.com/embed/frJOHx61Scw" title="Sportchi terapevtik istisnoni qaysi holatlarda qoʻllashi mumkin?" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Нигора Раҳмонова, Аброр Содиқов, Анвархўжа Аҳмедов (видео), ЎзА