Маълумки, ҳозирги кунда автомобилларни ювиш шохобчаси фаолиятини ташкил этиш учун ҳокимиятларда ер ажратиш ваколати йўқ. Бўш турган ер участкаларини тадбиркорлик фаолиятини амалга ошириш учун мулк ёки ижара ҳуқуқлари асосида реализация қилиш “E-auksion” электрон савдо платформаси орқали амалга оширилади.

Тадбиркор автоювиш шохобчасини очиши ва уни ривожлантириши учун  қандай талаблар қўйилади?  

Давлат экологик экспертизаси маркази ахборот хизмати раҳбари Шаҳзода Акрамованинг қайд этишича, автомобилларни ювиш жойлари Давлат экологик экспертизасидан ўтказиладиган фаолият турларининг рўйхатига асосан атроф-муҳитга таъсир кўрсатишнинг IV тоифаси (маҳаллий таъсир кўрсатиш) фаолият турига киради.  

Атроф-муҳитга таъсир кўрсатишнинг IV тоифасига мансуб фаолият турлари объектларининг давлат экологик экспертизаси буюртмачилар томонидан Давлат экологик экспертизаси марказининг ҳудудий филиалларига тақдим этиладиган атроф-муҳитга таъсирни баҳолаш тўғрисидаги анкета асосида ўтказилади. Автомобилларни ювиш шохобчаси фаолиятини ташкил этишда Давлат экологик экспертизасининг хулосасини олиш учун буюртмачилар томонидан ҳудудий санитария-эпидемиологик осойишталик ва жамоат саломатлиги хизмати бўлимларидан санитария-меъёрий ҳужжатларида белгиланган тартибларга биноан рухсатномалар олиш, объект ҳудудига яқин масофада истиқомат қиладиган фуқаролар иштирокида жамоатчилик эшитувлари ўтказилиши ва уларнинг розилигини олиш  ҳамда  артезиан қудуғидан ёки техник, ирригация тизимларидан автомобилларни ювиш учун сарфланадиган сув учун қонунчиликда белгиланган тартибда сувдан махсус фойдаланиш учун рухсатнома олиш талаблари бўлади.  

Автомобилларни ювиш шохобчаси фаолиятини ташкил этишда қандай таъқиқлар бор? 

Энг аввало  автомобилларни ювиш шохобчаси фаолияти давомида ишлаб чиқариш ва техник заруриятлар учун ичимлик сув тармоғидан фойдаланиш қатъиян таъқиқланади.  Шунингдек, автомобилларни ювиш жараёнидан ҳосил бўладиган оқова сувларни зарур меъёрий талаблар кўрсаткичлари даражасигача тозаламасдан, зарарсизлантирмасдан, канализация тармоғига, очиқ сув ҳавзаларига, ирригация тармоқлари ва релефга ташлаш мумкин эмас. Шу билан бирга кўп квартирали уйнинг лойиҳа ҳужжатларида кўзда тутилмаган ҳолларда ертўла қисмида автомобилларни ювиш шохобчаси ташкил этилмаслиги керак.

Автомобилларни ювиш шохобчаси фаолиятини ташкил этишда Давлат экологик экспертизасининг хулосасида айрим талаблар белгилаб қўйилган.

Хусусан, автомобилларни ювиш шохобчасида ҳосил бўладиган ишлаб чиқариш оқова сувлари зарарли кимёвий қўшимчалар, нефт ва мой аралашмаларидан тозаланиши учун самарадорлиги 99,5 фоиздан кам бўлмаган маҳаллий тозалаш иншооти ўрнатиш, ер ости сув заҳираларини нефт маҳсулотидан ифлосланишига йўл қўймаслик учун автомобилларни ювиш майдончаси, автомобил турар-жойи, кириш-чиқиш йўллари ер майдони кучли ҳимояланган махсус бетон тўшама билан қоплаш, ишлаб чиқариш оқова сувлари маҳаллий тозалаш иншоотида (махсус фильтр) тозалангандан кейин автомобилларни ювиш учун қайта ишлатилиши мақсадида айланма сув таъминоти тизимини ўрнатиш шулар жумласидандир.  

Шунингдек, маҳаллий тозалаш иншоотида ҳосил бўлган чўкмалар ва ифлосланган оқава сувлар ўз вақтида, шартнома асосида тегишли тозалаш ташкилотлари томонидан ассенизация машиналари ёрдамида оқова тозалаш иншоотига олиб чиқилишини таъминлаш, тупроқ ва ер ости сувларига оқова сувларини оқиб ўтишини олдини олиш учун мунтазам равишда тозалаш иншоотларининг профилактика текширувларини ўтказиш, корхона асосий фаолияти давомида ҳосил бўладиган барча чиқиндилар тўпланиши, олиб чиқиб кетилиши, қайта ишланиши ва зарарсизлантирилишини таъминлаш  ҳамда объект ҳудудининг санитария ҳолатини мунтазам назорат қилиш, бириктирилган ҳудудни озода сақлаш, ўсимлик дунёсига зарар етказмаслик, дарахтларнинг ноқонуний кесилишига йўл қўймаслик  каби талаблар ҳам мавжуд.

Муҳайё Тошқораева,

ЎзА