Тошкент шаҳар спорт бошқармаси масъуллари, пойтахт спорт мактабларининг раҳбарлари ҳамда шахмат бўйича мураббий-мутахассислари иштирокида йиғилиш бўлиб ўтди.
Унда пойтахтда шахмат мактабларини ташкил этиш ва ривожлантириш, ёшларнинг шахматга бўлган қизиқишини ошириш масалалари муҳокама қилинди.
Шунингдек, йиғилишда ташкилий масала кўрилди ҳамда ҳозирда Тошкент шаҳар ҳокими сифатида фаолият кўрсатиб келаётган Шавкат Умурзоқов Ўзбекистон шахмат федерацияси Тошкент шаҳар бўлими раиси этиб сайланди.
Шу билан бирга, Ўзбекистон шахмат федерацияси Тошкент шаҳар бўлими раисининг ўринбосарлари, ижрочи директори ҳамда котиби сайланди.
Раис ўринбосарлари этиб Тошкент шаҳар мактабгача ва мактаб таълими бошқармаси бошлиғи Нилуфар Ҳусанбоева, Ёшлар ишлари агентлигининг Тошкент шаҳар ёшлар ишлари бошқармаси бошлиғи Бобур Мирзаевлар сайланди.
Шайхонтоҳур тумани спорт мактаби директори Шерзод Зияматов ижрочи директор вазифасини бажаради. Бош котиб Тошкент шаҳар спорт бошқармаси бошлиғи ўринбосари Фаррух Абдураимов ҳисобланади.
Гулноза Бобоева, ЎзА