Ўзбекистон Республикаси Вазирлар Маҳкамаси “Давлат пенсия таъминоти тизимини ислоҳ қилиш концепциясини ишлаб чиқиш бўйича ташкилий чора-тадбирлар тўғрисида” қарор қабул қилди.
Унга мувофиқ, давлат пенсия таъминоти тизимини ислоҳ қилиш концепцияси лойиҳасини ишлаб чиқиш бўйича ишчи гуруҳ таркиби тасдиқланди.
Ишчи гуруҳнинг асосий вазифалари:
амалдаги давлат пенсия таъминоти тизимида мавжуд муаммоларни таҳлил қилиш ҳамда илғор хорижий тажриба асосида пенсия таъминоти тизимининг барқарорлигиии таъминлаш ва ижтимоий адолатни мустаҳкамлашга қаратилган таклифларни тайёрлаш;
асослантирилган таклифларга мувофиқ 2025 йил 1 мартга қадар Давлат пенсия таъминоти тизимини ислоҳ қилиш концепцияси лойиҳасини ишлаб чиқиш ва Ўзбекистон Республикаси Президенти Администрациясига киритишдан иборат.
Ишчи гуруҳга:
белгиланган вазифаларни амалга оширишда вазирлик ва идоралар, илмий ва таълим ташкилотлари, халқаро ташкилотлар мутахассисларини, шунингдек, маҳаллий ҳамда хорижий эксперт ва маслаҳатчиларни жалб қилиш;
Давлат пенсия таъминоти тизимини ислоҳ қилиш концепцияси лойиҳаси бўйича тайёрланаётган таклифларнинг мазмун-моҳиятини оммавий ахборот воситалари ва ижтимоий тармоқлар орқали кенг ёритиб бориш ҳамда белгиланган вазифалар бўйича сўров ўтказилишини ташкил қилиш;
Ўзбекистон Республикасининг хориждаги дипломатик ваколатхоналарини жалб қилган ҳолда тегишли масалалар юзасидан нуфузли хорижий экспертлар, олимлар ва мутахассислар билан учрашувлар ва муҳокамалар ўтказиш;
ривожланган хорижий давлатлар тажрибасини ўрганиш мақсадида Ишчи гуруҳга жалб этилган мутахассисларни хорижга қисқа муддатли хизмат сафарига юбориш ҳуқуқи берилади.
ЎзА