Жорий йилнинг 11-12 август кунлари бир гуруҳ ўзбекистонлик журналистлар учун Россия Федерациясидаги «ЗиО-Подольск» машинасозлик заводи фаолияти билан танишиш мақсадида пресс-тур ташкил этилди. «Росатом» давлат корпорацияси ва «Ўзатом» агентлиги ҳамкорлигида уюштирилган ушбу пресс-турнинг илк тадбири Москва шаҳридаги Халқ хўжалиги ютуқлари кўргазмасида Атом музейи билан танишувдан бошланди.
Қайд этиш керакки, 25 минг квадрат метрдан ортиқ майдонни эгаллаган ушбу музейда 1 минг 700 дан ортиқ экспонат намойиш этилади. Музейнинг ертўла қисмида атом тармоғи тарихи, биринчи қаватда замонавий ядро саноати, учинчи қават – келажак, яъни атомариум ва лаборатория жойлашган. Бу ерда болалар ва ёшлар учун интерактив ўйинлар ташкил этилган ҳамда илмий технологиялар ёрдамида кимё ва физикани ўрганиш учун шароитлар яратилган. Атом музейи ходими Артём Казиновнинг таъкидлашича, бу ерда атом йўналиши тарихи ва равнақи экспонатларда акс этган.
– Ядро саноати, ядро технологиялари ва ушбу соҳанинг бугунги кундаги ривожи ҳақида сўзлаб бериш бизнинг асосий вазифамиз ҳисобланади. Шунга қарамай, аксарият одамлар ушбу технологиялар ҳақида гапирганда, улар биринчи навбатда буни атом электр станциялари, деб тушунишади. Аммо биз ядро саноатини кўп қиррали эканлигини айтамиз. Бу ядровий тиббиёт технологияси, тоза сув олиш учун денгиз сувини тузсизлантириш, озиқ-овқат хавфсизлиги, илмий тадқиқ қилиш каби соҳалар билан ҳам боғлиқдир. Таъкидлаш керакки, Атом музейи ушбу кўргазма мажмуасидаги кенг қамровли экспозицияни жамлагани билан ажралиб туради. Шунингдек, уни МДҲ мамлакатлари орасида атом тарихи ҳақида батафсил маълумотлар оладиган ягона манзил дейиш мумкин. Шу сабабли, музей ҳамиша томошабинлар билан гавжум. Бу ерга ҳар куни минглаб томошабинларнинг ташриф буюриши унинг нуфузини янада яққол намоён этмоқда, – деди А.Казинов.
[gallery-18681]
Мутахассисларнинг сўзларига кўра, бу ерга қўйилган ҳар бир экспозиция атом тарихини намоён этади. Шу боис, уларнинг моҳиятини яхшироқ англаш учун бу ерга бир маротаба эмас, аксинча, бир неча бор келган афзал.
– Атом музейига келишни анчадан буён ният қилган эдик. Санкт-Петербургдан невараларим меҳмон бўлиб келди ва биз оилавий бу ерга келдик. Экспонатлар чиндан томошабинлар эътиборни тортади, бироқ соҳага доир маълумотларни тушуниш осон эмас. Реакторларни томоша қилиш, умуман, атом энергетикаси нима учун зарурлиги болаларга жуда қизиқарлидир. Экспозиция бизга манзур бўлди, – деди москвалик фуқаро Светлана Обжерина.
<iframe width="640" height="360" src="https://www.youtube.com/embed/e8dZPxMJoGk" title="Press-tur: Atom muzeyi bilan tanishuv" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Насиба Зиёдуллаева, Дониёр Ёқубов, ЎзА
Россия Федерацияси, Москва шаҳри.