Спорт гимнастикаси бўйича уч карра жаҳон чемпиони, жаҳон кубоги соҳиби Оксана Чусовитина – мамлакатимиз фахридир. У саккизта Олимпиадада қатнашган ягона гимнастикачи сифатида Гиннес рекордлар китобига киритилган.

Юртимизда шундай спортчининг бўлиши навқирон авлод учун намуна ҳамдир. Президентимизнинг жорий йилнинг 22 июнь куни «Тошкент шаҳрида бокс ва гимнастикага ихтисослаштирилган спорт мактаблари фаолиятини ташкил этиш бўйича қўшимча чора-тадбирлар тўғрисида»ги фармони спортсевар ёшларга янада кенг имкониятлар яратади.  

Ушбу ҳужжат билан Оксана Чусовитина номидаги гимнастикага ихтисослаштирилган спорт мактаби қайта ташкил этилди ва Спорт вазирлиги тизимидан Мактабгача ва мактаб таълими вазирлиги ҳузуридаги Ихтисослаштирилган таълим муассасалари агентлигига ўтказилди.  

Ушбу даргоҳда 7 ёшдан бошлаб, маҳоратли ва номдор мураббийлар томонидан икки йўналишда спорт ва бадиий гимнастика сабоқлари берилади.  

Бу ерда 168 нафар ўғил-қизларга соҳа сирларини эгаллаш ва маҳоратларини ошириш учун барча шароитлар яратилган. Бугунги кунда 87 нафар спортчи машғулот ўтамоқда. Уларга иккита хорижий тил ҳам ўргатилади. Ёш гимнастлар умумий таълим дарсларини туташ ҳудудда жойлашган мактабда ўқийди.  

Муассаса миллий терма жамоаларимиз учун халқаро даражадаги спортчиларни тайёрлаш, юқори малакали мураббий ва мутахассисларни жалб этиб, ўқув-машғулот жараёнини халқаро стандартлар даражасида ташкил қилиш, гимнастикачилар маҳоратини мунтазам ошириб боришга йўналтирилган. Бунинг учун асосий машғулотлар залига қўшимча тренажёр майдончаси, тиббиёт хонаси ва ошхона, 165 ўринли ётоқхона, меҳмонхона, информатика ва маънавият хоналари тайёрлаб қўйилган. Мактаб Германиядан келтирилган спорт анжомлари ва жиҳозлари билан таъминланган. Ушбу бинонинг лойиҳа қиймати 38 млрд. сўмни ташкил қилади.  

Чусовитина издошлари ўтган йили спорт гимнастикаси ва бадиий гимнастика бўйича халқаро мусобақаларда 4та, республика турнирларида 6та ва спорт мактаблари ўртасида 24та медални қўлга киритган.  

<iframe width="640" height="420" src="https://www.youtube.com/embed/KIUSlxN41E8" title="Oksana Chusovitina izdoshlari endi koʻpayadi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Муҳими шундаки, гимнастикачи ёшлар бир жойнинг ўзида яшаб, таълим олиб, машғулот ўтказадилар. Умуман олганда, бу спорт мактаби гимнастикачилар учун республикада ягона ўқув-машғулот базасига айланди.  

Фармон билан спорт соҳасидаги таълимнинг узвийлиги ва узлуксизлигини таъминлашга ҳар бир туман ва шаҳарда камида 3 тадан энг намунали давлат мактабгача таълим ташкилотларини танлаб олиб, гимнастика хоналарини ташкил қилиш ҳамда зарур шароитлар яратиш кўзда тутилган.  

Санжар Тошпўлатов, Аброр Содиқов, Улуғбек Тўхтаев(видео), ЎзА