Ҳозирги кунда Фарғона вилоятида Ихтисослаштирилган таълим муассасалари агентлиги тизимидаги 19 та ихтисослаштирилган мактаб ва мактаб-интернатлари фаолият юритмоқда. 2024-2025 ўқув йили учун мазкур мактабларга жами 25 мингдан ортиқ ариза келиб тушган.
Айни дамда Фарғона ва Марғилон шаҳрида тест синовлари учун ҳар томонлама тайёрланган 11 та бинода мазкур мактабларга кириш имтиҳонлари бошланди.
Мактабларга ўқувчилар қабули Ўзбекистон Республикаси Вазирлар Маҳкамасининг 2023 йил 27 майдаги 214-сонли қарори билан тасдиқланган низомлар асосида ташкил этилмоқда. Кириш имтиҳонлари аниқ ва табиий фанлар йўналиши бўйича белгиланган фанлардан тест шаклида ўтказиляпти. Бугунги имтиҳон жараёнларида 17 минг 780 нафар 5-синф ўқувчилари иштирок этди.
[gallery-18129]
-Фарзандим ҳам бугунги кириш имтиҳонларида иштирок этмоқда, -дейди Риштон туманилик Ботиржон Каримов.-Талабгорлар ва ота-оналар учун етарли шароитлар яратилган. Албатта, билимли, ўз устида ишлайдиган ўқувчи кириш имтиҳонларидан муваффақиятли ўтади.
М.Сулаймонов,
М.Қодиров(сурат),ЎзА мухбири