Президентимизнинг Туркия давлатига расмий ташрифи икки мамлакат ўртасида кўплаб соҳаларда ҳамкорлик қилиш имконини янада кенгайтирди. Хусусан, ОКМК бошқаруви раиси Абдулла Хурсанов мазкур ташриф доирасида тоғ-кон саноати, соҳадаги янгиликлар ҳақида ўз фикр-мулоҳазаларини билдирди.

– Мазкур ташриф давомида Анқара шаҳрида икки давлат раҳбарлари раислигида бўлиб ўтган Ўзбекистон-Туркия Ишбилармонлар кенгашининг биринчи йиғилиши иқтисодиётнинг долзарб йўналишларига бағишланди, – дейди ОКМК бошқаруви раиси А.Хурсанов. – Бу ўз навбатида биз каби соҳа вакиллари учун муҳим аҳамиятга эга бўлди. Хусусан, республикамиздаги турли соҳалар, жумладан, тоғ-кон саноатига ҳам инвестицияларни жалб қилиш борасида ҳам сўз юритилди. Ташриф доирасида Туркиянинг “Esan Eczacibasi” компанияси билан биргаликда Жиззах вилоятининг Фориш туманидаги Учқулоч конини ўзлаштириш лойиҳаси бўйича инвестиция битими имзоланди. Унинг қиймати 100 миллион доллардан ошади. Бу лойиҳа асосида бир йилда 500 минг тонна маъдан қайта ишланади. Бундан ташқари, комбинатимиз таркибидаги руҳ заводимизни хомашё билан таъминлайди.  

Шуни таъкидлашим лозимки, Ўзбекистон – Туркия давлатларининг дўстона муносабатлари туфайли 2023 йилда ОКМКнинг турк компаниялари билан умумий товар айланмаси 147 миллион долларни ташкил қилди. Жорий йилнинг биринчи чорагида эса 7 миллион 700 минг доллардан кўпроқ маҳсулотлар мазкур давлатга экспорт қилинди. Ишонаманки, мазкур ҳамкорликлар соҳанинг ривожига ўз ҳиссасини қўшади.  

<iframe width="560" height="315" src="https://www.youtube.com/embed/qqOi-_9uWDk?si=gn3C-l1j0NpuU30E" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

ЎзА мухбири

А.Мусаев ёзиб олди.