Жорий йилнинг 4 июнь куни Ахборот ва оммавий коммуникациялар агентлигида Ўзсаноатқурилишбанк тизимида телемаркетинг ва телефон орқали сотув фаолиятига бағишланган брифинг бўлиб ўтди.
Маълумки, бугунги рақамли трансформация ва илғор технологиялар асри барча жабҳалар қатори банк хизматларини кўрсатишнинг янги усулларини жорий этиш, вақт ва харажатларни камайтириш талабини қўймоқда.
2020 йилда Президентимиз томонидан тасдиқланган 2020-2025 йилларга мўлжалланган Ўзбекистон Республикасининг банк тизимини ислоҳ қилиш ҳамда “Рақамли Ўзбекистон – 2030” стратегияларида эса, уларни босқичма-босқич амалга ошириш механизмлари белгилаб берилган.
Ўзсаноатқурилишбанк алоқа марказининг сотув нуқтасига айлантирилгани, аввало, тизимдаги трансформация маҳсули, қолаверса, давр талабидан келиб чиққан ҳолда амалга оширилган лойиҳалардан биридир.
Мазкур марказ бошланғич даврда мижозлар саволларига жавоб бериш ҳамда банк маҳсулот ва хизматлари ҳақида маълумот тақдим этиб келган.
Бугунги кунда эса, марказ ходимлари аҳолига кредит карта, микроқарз, депозит, пластик карталар каби кенг турдаги банк маҳсулот ва хизматларини сотиш билан ҳам шуғулланмоқда.
Брифингда таъкидланганидек, телемаркетингга асосланган ушбу ёндашув банкнинг мобил офиси сифатида хизмат кўрсатмоқда. Бунда мижозлар уй ва/ёки хизмат офисидан чиқмаган ҳолда банк маҳсулотларини сотиб олишга муваффақ бўлмоқда.
Тизим телефон қўнғироқларидан фойдаланиб, мавжуд ва потенциал мижозлар билан мулоқот қилиш, банк маҳсулот ёки хизматларини сотиш, шунингдек, турли маркетинг акциялари тарғиботи ва қўшимча маълумотларни таклиф қилишни ўз ичига олади. Бунда ходимлар учун мулоқот стандартлари ишлаб чиқилди. Уларга сотув асослари бўйича кўникмалар ҳам берилди.
– Ўтган йили Алоқа маркази томонидан 90 мингдан зиёд қўнғироқлар қайта ишланди, – дейди “Ўзсаноатқурилишбанк” Ахборот хизмати раҳбари Беҳзод Бозоров. – Ушбу қўнғироқ эгаларининг 10 фоизи банк маҳсулотларини харид қилди. Жорий йилнинг биринчи чораги мобайнида ҳам марказнинг сотув фаолияти сезиларли даражада ошиб, мижозларга хизмат кўрсатиш стандартларига риоя қилинганлик кўрсаткичи (CSAT индекси) 95 фоизга етказилди. Ушбу даврда аҳоли томонидан банкнинг онлайн турдаги кредитларига катта қизиқиш билдирилди.
Қайд этиш жоизки, марказ фаолиятидаги ушбу ижобий ўсишлар тизим имкониятларини кенгайтириш ҳисобига юзага келмоқда.
Хусусан, Мижозлар билан ўзаро муносабатларни бошқариш (Customer Relationship Management – CRM) тизимининг жорий этилиши уларга тегишли маълумотларни самарали бошқариш ва кўплаб жараёнларни автоматлаштириш имконини яратди. Масалан, скриптлар ва автоқўнғироқдан фойдаланиш натижасида қўнғироқларни якунлаш вақти кескин қисқарди.
Бундан ташқари, мижознинг биометрия маълумотлари орқали шахсини аутентификация қилиш фаол операцияларни масофадан амалга ошириш имконини бермоқда. Яъни, мижоз картаси блокланса ёки паспорт маълумотлари эскирган тақдирда унинг банк хизматлари марказига бориши шарт эмас. Барчасини Алоқа марказига қўнғироқ қилиб, операторлар кўмагида 24/7 режимида амалга ошириш мумкин.
Айни пайтда марказ фаолиятида сунъий интеллектни қўллаш бўйича ҳам ўрганишлар олиб борилмоқда. Бу борада чат-ботлар ва овозли ёрдамчилардан фойдаланиш синов босқичидан ўтмоқда.
Брифингда банк тизимида аҳолига хизмат кўрсатишни янада яхшилаш, сотув жараёнларини оптималлаштириш ҳамда мижозлар эҳтиёжларига мос ечимларни таклиф қилиш йўлидаги ўрганишлар давом этаётгани айтиб ўтилди.
Банк Ахборот хизмати
Реклама ҳуқуқи асосида