Тошкентда енгил атлетика бўйича ўтаётган Ўзбекистон очиқ чемпионати баҳсларида ҳамюртларимиздан ташқари Тожикистон, Қозоғистон ва Украина давлатидан келган 355 нафар енгил атлетикачилар ғолиблик учун кураш олиб бормоқда.
Мусобақа жараёнида жорий йилнинг 21 апрель куни пойтахтимизда ўтган Тошкент VI халқаро марафонида бош соврин - BYD машинасини ютиб олган маҳоратли енгил атлетикачиларимиз Шоҳрух Давлатов ва Екатерина Тунгускова мукофотни тантанали топшириш маросими ташкил этилди.
Спортчиларга автомашина калитларини топшириш маросимида иштирок этган Миллий олимпия қўмитаси бош котиби Ойбек Қосимов, Ўзбекистон енгил атлетика федерацияси раиси ўринбосари Андрей Абдувалиев, енгил атлетика бўйича республика олий маҳорат мактаби директори Санъат Ғуломназаров юртимизда оммавий спортни ривожлантириш орқали маҳоратли спортчиларни тайёрлашга катта эътибор қаратилаётганлиги янги ғалабаларни таъминлашга хизмат қилиши билан аҳамиятли эканлигини таъкидлашди.
Бевосита мусобақалар хусусида тўхталадиган бўлсак, Бутунжаҳон енгил атлетика федерацияси тақвимидан ўрин олган Ўзбекистон очиқ чемпионати Париж-2024 Олимпия ўйинларига рейтинг очколарни тақдим этади.
Енгил атлетиканинг 45 та дастурини қамраб олган очиқ чемпионат баҳсларида Шарифа Давронова, Светлана Радзивил, Сафина Саъдуллаева, Суҳроб Ходжаев каби терма жамоамиз етакчи спортчилари иштирок этмоқда.
Т. Рўзиев, ЎзА