Олмалиқ кон-металлургия комбинатида “Ёшлик-1 конини ўзлаштириш” инвестиция лойиҳасини ишга тушириш ишлари давом этмоқда. Лойиҳа доирасида “Ёшлик-1” кони учун бир қатор замонавий технологик кон транспорт воситалари олиб келинмоқда.
Куни кеча конга транспорт хизматини кўрсатиб келаётган Технологик транспорт бошқармаси технопарки яна иккита замонавий автогигант билан бойиди.
ТТБ бошлиғининг транспорт воситаларидан фойдаланиш бўйича ўринбосари Баҳром Ниязметовнинг маълум қилишича, лойиҳа доирасида 2024 йилда яна 5 дона НМТE-240 русумли автосамосвал олиб келиниши режалаштирилган. Январь ойида 2 та ана шундай автогигант келтирилган эди. Яқин кунларда яна 1 дона мана шундай самосвал олиб келинади. Ушбу самосвалларнинг юк кўтариш қуввати 236 тоннани ташкил этиб, транспорт воситаси тўлиқ автоматлаштирилган. Эътиборлиси, ушбу автосамосваллар маҳаллийлаштириш дастури асосида "НУРАФШОН-МАХСУС-ТEХНИКА" МЧЖда ишлаб чиқарилмоқда.
Маълумот учун: 2020-2021 йилларда “Ёшлик-1 конини ўзлаштириш инвестиция лойиҳаси” доирасида 29 та 220 тонна юк кўтариш қувватига эга бўлган “БелАЗ” русумли автосамосваллар келтирилган.
ОКМК
Ахборот хизмати