Жанубий Американинг Перу давлати пойтахти Лима шаҳрида давом этаётган оғир атлетика бўйича ўсмирлар ўртасидаги жаҳон чемпионатида мамлакатимизнинг икки нафар спортчиси 6 та медални қўлга киритди.

Ўзбекистон оғир атлетика федерацияси матбуот хизматининг хабарига кўра, жаҳон чемпионати баҳсларида қизлар ўртасида -59 килограмм вазн тоифасининг «А» гуруҳида супачага чиққан терма жамоамиз аъзоси Маржона Абдумуталова даст кўтаришда 82 кило билан бронза, силтаб кўтаришда 100 килограмм натижа кўрсатиб кумуш ҳамда иккикурашда 182 килограмм натижа билан бронза медалига эга чиқди.

Перуда кечаётган чемпионатнинг эркаклар ўртасидаги баҳсларида -81 килограмм вазн тоифасида ватанимиз шарафини ҳимоя қилган Руслан Раҳматжонов мусобақанинг «А» гуруҳида супачага кўтарилди. У даст кўтаришда 139 кило билан кумуш, силтаб кўтаришда 172 килограмм натижа билан олтин ҳамда иккикурашда 311 килограмм натижа билан олтин медалга сазовор бўлди.

Истеъдодли спортчиларимиз Маржона ва Русланнинг океан орти мамлакатида ўтаётган жаҳон чемпионатида эришган натижалари юртимизда жаҳон оғир атлетикасида ўз номига эга бўлган спортчиларнинг янги авлоди камолга етаётганлигини кўрсатди.

26 майга қадар давом этадиган чемпионатнинг навбатдаги баҳсларида терма жамоамиз аъзоларидан Дилноза Файзуллаева, Бекзод Ғофуржонов ва Омадилло Олимов иштирок этади.

 

Т. Рўзиев, ЎзА