“48 соатлик кинопойга” халқаро танловининг “Энг яхши фильм” номинациясида Ёлқин Тўйчиев устахонаси талабалари томонидан суратга олинган “Манзилсиз уй” фильми ғолиб бўлди, деб хабар бермоқда Миллий кинематографияни ривожлантириш маркази ахборот хизмати.

Ушбу фильм режиссёри — Жасур Туробхўжаев, сценарий муаллифлари — Марьям Пўлатова ва Лианна Саломова.  

Куни кеча Марказий Осиё кино ижодкорлари учун ўтказилган “48 соатлик кинопойга” танлови якунланди. Икки сутка ичида иштирокчилар тўрт дақиқагача бўлган қисқа метражли фильм тайёрлаган. Фильм ижодий топшириққа кўра тайёрланади. Персонаж ва бир неча жумла берилади. Сценарийни тайёрлаш, суратга олиш ва  бошқа ижодий-техник ишларга ҳаммаси бўлиб, атиги 48 соат вақт ажратилди.  

Танлов ғолиблари "New York Film Academy"да фильм-мейкинг курсида ўқийди. "New York Film Academy"дан кинорежиссура, саҳна маҳорати, продюсерлик, монтаж ва  операторлик маҳорати каби йўналишлар бўйича стипендия олади.  

 

Н.Усмонова,  

ЎзА