Икки йилдан бери анъанавий тарзда ўтказиб келинаётган Ўзбекистон Республикаси Президенти соврини учун World Series Pro халқаро турнирлари жорий йилдан янгича форматда ўтказилади.
Давлатимиз раҳбарининг “Кураш миллий спорт турини янада ривожлантириш ва унинг халқаро нуфузини янада ошириш чора-тадбирлари тўғрисида”ги қарорида миллий спорт туримизни жаҳон дурдонасига айлантиришда World Series Pro (WSP) турнирларининг ўрни беқиёслигидан келиб чиқиб, мазкур мусобақалар жорий йилдан эътиборан янгича форматда ташкил этилиши белгиланди.
Халқаро кураш ассоциацияси томонидан ишлаб чиқилган режага кўра, мусобақаларнинг вазн тоифалари 10 тага етказилиб, унда барча қитъавий чемпионат иштирокчилари WSP турнирида иштирок этиш ҳуқуқига эга бўлади.
Хўш, қитъавий чемпионат иштирокчилари қайси мезонлар асосида Ўзбекистон Республикаси Президенти соврини учун World Series Pro халқаро турнирида қатнаша олади?
– Албатта, ҳар қандай спортчининг энг катта орзуси жаҳон чемпионати ҳамда нуфузли халқаро мусобақаларда қатнашиш, муносиб ўринларни эгаллаш. Мукофотларга эга чиқиш. Шу жиҳатдан, курашчилар World Series Pro халқаро турнирида қатнашиш имкониятига эга бўлиши учун энг аввало қитъа чемпионатида белгиланган рейтинг балларини қўлга киритиши лозим, – дейди Халқаро кураш ассоциацияси ахборот хизмати раҳбари Жамшид Намозов.
IKA тақвим режасига кўра, 2024 йилда Европа, Осиё, Африка ва Пан Америка чемпионатлари ўтказилиши белгиланган бўлиб, айнан ушбу мусобақаларда муносиб рейтинг балларини тўплаган курашчилар World Series Pro (WSP) турнирида қатнашиш имкониятига эга чиқади.
Мазкур қитъавий чемпионатларда WSP рейтингига эга бўлган спортчилар йил охирида пойтахтимизда ўтадиган World Series Pro халқаро турнири финал босқичида ўз вазн тоифасида ғолиблик учун кураш олиб боради.
Т.Рўзиев, ЎзА