Жойларда ўтаётган сайёр қабуллар фуқаролар мурожаатларини тинглаш, уларнинг муаммоларини ҳал этишда муҳим аҳамият касб этмоқда. Бу жараёнда суд идоралари ҳам иштирок этмоқда.

Тошкент вилоятининг Янгийўл шаҳрида ўтказилган навбатдаги сайёр қабулда Янгийўл шаҳри, Зангиота, Янгийўл, Чиноз ва Қуйи Чирчиқ туманларида яшовчи фуқаролар мурожаатларини Тошкент вилояти прокуратураси, Ички ишлар бош бошқармаси, вилоят суди, Халқ қабулхонаси, департамент, адлия, солиқ ҳамда вилоят мажбурий ижро ва божхона бошқармалари раҳбарлари атрофлича ўрганиб чиқишди.  

Хусусан, вилоят судлари раислари томонидан сайёр қабулда жами 37 нафар фуқаро қабул қилинди. Уларнинг 19 нафари фуқаролик, 11 нафари жиноят, 5 нафари иқтисодий ва 2 нафари маъмурий ишлар бўйича судларга оид масалалар билан келган. Шу мурожаатларнинг 23 таси бўйича ҳуқуқий тушунтиришлар берилди ва 14 таси жойида ижобий ҳал этилди.  

– Мазкур сайёр қабулда анчадан буён йиғилиб қолган муаммоли масалаларга алоҳида эътибор қаратилди, – дейди вилоят суди жамоатчилик ва ОАВ билан алоқалар бўлими бош консультанти Шерзод Худойбердиев. – Айниқса, жиноят ишлари бўйича судларда тақдимнома (илтимоснома)лар асосида жами 41 нафар маҳкум ўталмай қолган озодликни чеклаш ва ахлоқ тузатиш ишлари жазосидан муддатидан илгари шартли равишда озод қилинди. Фуқаролик ишлари бўйича судларда 5 нафар фуқаронинг фойдасига вояга етмаган фарзандларининг таъминоти учун алимент пули ундирилиши таъминланди.  

Иқтисодий судларда 8 нафар тадбиркорлик субъектининг қонуний ҳуқуқ ва манфаатлари тикланиб, улар фойдасига жами 397 миллион 220 минг 699 сўм қарздорлик ундирилиши белгиланди.

Сайёр қабул жараёнида мурожаатлари ижобий ҳал этилган жами 68 нафар фуқаро Ўзбекистон Республикаси Президенти номига ташаккурнома билдирди.  

А.Мусаев, ЎзА мухбири