“Ўзэнергоинспекция” Фарғона вилояти ҳудудий бошқармаси томонидан ўтказилган тезкор тадбирда Риштон туманида фаолият юритувчи “Ф.М.” МЧЖнинг масъул шахслари автомобилларга газ тўлдириш компрессор шохобчасига ўрнатилган компрессор агрегатларини тижорат мақсадида электр тармоғига ўзбошимчалик билан улаб, ноқонуний фойдаланиб келаётгани аниқланди.

Ушбу қоидабузарлик натижасида 3,6 миллиард сўмлик (2,7 млн. кВт⋅соат) электр энергиясидан ноқонуний фойдалангани маълум бўлди. Мазкур ҳолат юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари ўтказилмоқда.  

Шунингдек, Қўштепа туманида фуқаро X.T. га қарашли мева ва сабзавотларни сақлаш учун ташкил этилган музлатгичда электр ҳисоблагичнинг уланиш схемалари хато улангани маълум бўлди.  

Ушбу ҳолат бўйича дастлабки ҳисоб-китобларга кўра, электр таъминоти корхонаси томонидан 716 миллион 429 минг сўм миқдоридаги ҳисобга олинмаган электр энергияси қайта ҳисоб-китоб қилинди.  

Қоидабузар истеъмолчига нисбатан белгиланган тартибда чора кўриш учун тегишли ҳужжатлар расмийлаштирилиб, ҳуқуқни муҳофаза этувчи органларга тақдим қилинди.  

 

Н.Зиёдуллаева тайёрлади,  

ЎзА