Кечувда отлар алмаштирилмайди!

Ўтаётган ҳафта Россия раҳбари Владимир Путин қасамёд қилиб, бешинчи бор президентлик вазифасига расман киришди. Шундай қилиб, унинг фаолияти 2030 йилгача давом этадиган бўлди. Путин қасамёд нутқида халқни бирдамликка чорлаб, оғир даврдан ғалаба билан чиқишга ишонч билдирган.

Қонунчилик бўйича янги сайланган президент ишга киришиши билан ҳукумат истеъфога чиқиши керак. Путин янги ҳукумат иқтисодий соҳада ижобий ўзгариш қилиши, энг замонавий қурол-яроқ ишлаб чиқаришни кенгайтиришидан умидвор.

Москва ўтаётган ҳафта Иккинчи жаҳон урушидаги 79 йиллик ғалабани нишонлади. Тантаналарга фахрий меҳмон сифатида чақирилган Марказий Осиё мамлакатлари раҳбарлари қаторида Куба, Лаос, Гвинея-Бисау давлатлари етакчилари ҳам бор эди.

Украиналик эскпертлар фикрича, рус қўшинлари янги фронт ташкил қилмоқчи. “Al-Jazeera” 10 май куни Москва Суми ва Харьковни эгаллашга жиддий киришганини ёзган. Бош қўмондон Александр Сирский ўн минглаб аскарларни шай ҳолатга келтириб, шимолдаги кучларга қўшимча қурол-яроқ етказиб беришни тезлатгани маълум.

“NewYorkTimes” нашрига кўра, Россия Беларуснинг Осиповичи ҳудудида ядро қуролини сақлаш учун ҳарбий база қурмоқда. Бу ерга “Искандар” ракеталари ҳам жойлаштирилиши мумкин.

Урушнинг учинчи йилига келиб, Европа давлатлари ўз хавфсизлиги учун ўзлари жавоб беришлари кераклигини англаб етмоқда. Кўҳна қитъанинг аксар етакчилари Европа ўз мудофа архитектурасига эга бўлиши муҳимлиги ҳақида гапирмоқда. Франция раҳбари фикрича, Россия каби чегара ва чеклов билмайдиган давлат билан тўқнаш келган Европа етарли даражада қуролланмагани кўриниб қолди.

Украина разведкаси бошлиғи ўринбосари Вадим Скибиский Россия Болтиқбўйи давлатларини бир ҳафта ичида босиб олиши мумкинлигини айтган:

–НАТО бу мамлакатларга ёрдам беришни бошлаши учун камида 10 кун вақт кетади. Украинага ёрдам бериш эҳтиёжи ортиб бораётган бир пайтда, Европанинг қолган қисмида Россия таҳдидини англаш зарурати ҳам кучаймоқда.

НАТО Бош котиби Йенс Столтенберг таъкидлашича, Россиянинг гибрид фаолияти, жумладан нотўғри маълумот тарқатиш, жосуслик ва бошқа кампаниялари Европада аллақачон бошланган.

Санкт-Петербургда 20 нафар йўловчиси бўлган автобус Мойка дарёсига қулаб тушди. Сўнгги маълумотга кўра, 7 киши ҳалок бўлган. Полиция ҳайдовчини гумонланувчи сифатида қўлга олган. Тергов қўмитаси хавфсизлик талабига жавоб бермайдиган хизмат кўрсатиш айби билан алоҳида иш очгани айтилмоқда. Хабар қилинишича, ҳайдовчи тожикистонлик.

Ғазодан ҳали хушхабар келаётгани йўқ. ҲАМАС ўт очишни тўхтатишга рози бўлди, Исроил эса бунга кўнмади. Гуруҳнинг қарорини фаластинликлар кўчаларга чиқиб нишонлади, аммо уларнинг хурсандлиги узоқ чўзилмади. 7 майга ўтар кечаси Исроил кучлари Рафоҳга ҳужум қилиши оқибатида 20 нафарга яқин одам вафот этган.

Исроилга ҳозир сулҳ керак эмас, яҳудий давлати урушни тўхтатмаслиги учун бир неча сабаб бор. Таҳлилчиларга кўра, Нетаньяҳу ватандошларига ҲАМАСни йўқ қилишга ваъда берган. Қолаверса, Беньяминнинг ҳокимиятда қолиш ёки қолмаслиги ҳам урушнинг натижасига боғлиқ. Тинчлик ўта ўнг коалиция парчаланиши, муддатидан олдин сайлов ўтказилиши ва унинг ҳокимиятдан четлатилишига олиб келиши мумкин. Хабарларга кўра, Исроилнинг ўта ўнгчи миллий хавфсизлик вазири Бен Гвир ва молия вазири Бизолил Смотрич агар Исроил асирлар бўйича шартномага ва ўт очишни тўхтатишга рози бўлса, Нетаньяҳу коалицияси тарқатиб юборилиши билан таҳдид қилган. Дарвоқе, Қўшма Штатлар Рафоҳдаги амалиётга қарши чиқиб, қурол етказиб беришни тўхтатиб қўйди.

БМТда кузатувчи мақомидаги Фаластинни тўлиқ аъзоликка қабул қилиш бўйича 10 май куни йиғилиш бўлиб ўтди. 143 давлат ушбу ташаббусни қўллаб-қувватлади. АҚШ агар таклиф Хавфсизлик Кенгашига киритилса, вето қўйишини айтган. Ташкилотга аъзолик тўғрисидаги қарор фақат ХК томонидан қабул қилиниши мумкин.

Си Цзиньпиндан Европага юриш

Ҳафта бошида ХХР Раиси Си Цзиньпин сўнгги беш йил ичида илк бор Европага ташриф буюрди. Таҳлилчилар ташрифнинг алоҳида сабаблари сифатида Россия – Украина зиддияти асносида Европа билан совуқлашган алоқани ўз ҳолига қайтариш, Европа Иттифоқининг Хитойга нисбатан иқтисодий хавфини юмшатиш, Сербия ва Венгрия билан алоқани янада мустаҳкамлаш масалаларини кўрсатди.

Учрашув давомида Макрон ХХР етакчисининг Россияга босим ўтказиши ва шу орқали Украинадаги урушга барҳам беришидан умид қилган. Шунингдек, томонлар ўзаро савдо ва бошқа қатор масалалар юзасидан фикр алмашган.

<iframe width="560" height="315" src="https://www.youtube.com/embed/XAGXYaUTGC8?si=igl3uZ9WNAvcVJ35" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Сардорбек Поёнов, Искандар Исматов, Улуғбек Тўхтаев (видео), ЎзА.